ஐ.நா.வில் அமெரிக்கா சமர்ப்பித்துள்ள 21 அம்சத் தீர்வுத் திட்டம் மத்திய கிழக்கின் அமைதிக்கு வழி வகுக்குமா?

அமெரிக்காவில் நடைபெற்று முடிந்த ஐ. நா. பொதுச்சபையின் 80வது கூட்டத்தொடரில் கலந்து கொண்டிருக்கும் GCC நாடுகளின் தலைவர்களுக்கும், அமெரிக்காவின் வெளியுறவுச் செயலாளர் மார்க்கோ ரூபியோவுக்குமிடையிலான சந்திப்பு ஒன்று கடந்த 24ம் திகதி நியூயோர்க் 'லோட்பெலஸ்' ஹோட்டலில் நடைபெற்றது.

இஸ்ரேல் - பாலஸ்தீன மோதலை உடனடியாக நிறுத்தி இருதரப்பினருக்குமிடையில் சுமுக நிலையை ஏற்படுத்துவது வேண்டி, அரபுத்தலைவர்கள் விடுத்த கோரிக்கைக்கிணங்க அமெரிக்கா 21 அம்சங்கள் கொண்ட தீர்வுத்திட்டமொன்றை வரைபு செய்தது; திட்டம் ஹமாஸ் மற்றும் இஸ்ரேல் தரப்பினரால் ஏற்றுக்கொண்டிருப்பதாக சமூக ஊடகங்களில் பதிவுகள் கசிந்த வண்ணமாக உள்ளன.

"காஸாப் போரை முடிவுக்குக் கொண்டு வந்து, பாலஸ்தீன அரசுக்கான பாதையை உருவாக்குவதற்கான 21 அம்ச திட்டத்தை அமெரிக்கா வெளியிட்டது" என்ற தலைப்பில் இஸ்ரேல் தனது 'த டைம்ஸ் ஒப் இஸ்ரேல்' செய்தி இதழில் கட்டுரை ஒன்றை வெளியிட்டிருந்தமையே பதிவுகளின் இவ்வாறான பதிவுக் கசிவுக்குக் காரணமாகும்.

"இஸ்ரேலும் ஹமாஸும் இந்த திட்டத்திற்கு உடன்பட்டால், போர் உடனடியாக முடிவுக்கு வரும் ... ஹமாஸ் காஸாவில் நிர்வாகத்திலிருந்து விலக்கப்படும்... இஸ்ரேல் இராணுவ நடவடிக்கைகளை இடைநிறுத்தி, படிப்படியாக திரும்பிச் செல்லும்... அனைத்து பணயக்கைதிகளும் 48 மணி நேரத்திற்குள் விடுதலைபெறுவர் ... பாலஸ்தீனக் கைதிகள் விடுவிக்கப்படுவர்... இடைக்கால நிர்வாகம் உருவாக... காஸாவின் இராணுவமயமாக்கப்படும்... "

இவ்வாறான நிபந்தனைகள் 21 அம்சத் தீர்வுத் திட்டத்தில் அடங்கியிருப்பதாக அந்தக் கட்டுரையில் குறிப்பிடப்பட்டுள்ளது.

ஆனால், கட்டுரை தரும் தகவல்கள் " இருபக்கமும் ஏற்றுக் கொண்டால்" என்ற போக்கில்தான் உள்ளது; அதாவது, இது சாத்தியமான வரையறைகளுடனான ஒரு முன்மொழிவே தவிர, இதற்கான சரியான “ஒப்புதல்” எதுவும் இருபக்கங்களினாலும் உறுதி செய்யப்பட்டதாகவும் இல்லை.

"21 நிபந்தனைகள்” என்ற முன்மொழிவுச் சுருக்கம் அமெரிக்க அரசின் முன்மொழிவு; “The Times of Israel” வெளியிட்டுள்ள செய்தியில் கூறியிருப்பது உண்மையாக இருந்தாலும், அதை “இஸ்ரேல் மற்றும் ஹமாஸ் ஏற்றுக்கொண்டார்கள்” என்பதை முழுமையாக உறுதி செய்ய இயலாத நிலையில்தான் தகவல்கள் வெளிப்படுகின்றன. “ஏற்றுக்கொண்டது” என்ற பதம் மிகவும் வலுவானது அதற்கு அரசியல், பாதுகாப்பு, சட்டம் மற்றும் போர் நிலை ஆகிய விளக்கங்கள் இருப்பது அவசியம்!

மத்தியஸ்தர்கள் (Mediators) சிலருக்கு இந்த முன்மொழிவை பரிசீலிக்க அனுப்பி வைக்கப்பட்டிருந்தாலும், சம்மதம் கிடைத்ததை உறுதி செய்ததாக எந்த சர்வதேச வெளிப்பாடும்

இதுவரை வெளியாகவில்லை!

இருசாராரும் பொதுவாக “இணங்க முனைவோம்” என்ற பதங்களை வெளியிட்டிருந்தாலும், "இந்த 21 நிபந்தனைகளை முறையாக ஒப்புக் கொண்டுள்ளனர்" என்ற பொதுவாக உறுதி கூறும் ஆதாரம் இதுவரை கிடைத்ததாக இல்லை. அதனால், இதனை “மறுசீராய்ச்சி செய்யலாம்” என்ற உத்தரவாதப் பாணியிலான செய்தி என்றுதான் கருதவேண்டும்.

அமெரிக்க அரசு, இந்த 21 முன்மொழிவை ஐ.நா. ஜெனரல் ஆய்வுக்காக அனுப்பியிருந்தாலும், ஹமாஸிடம் இத்திட்ட ஆவணம் இன்னும் போய்ச் சேரவில்லை என்று Reuters கூறுகிறது. ரீயூட்டர்ஸ் அறிக்கை “இஸ்ரேல் மற்றும் அமெரிக்கா இந்த முன்மொழிவை பரிசீலித்து வருகின்றனர்; ஒத்துழைப்பு முயற்சிகள் உள்ளன” என்றுதான் குறிப்பிடுகின்றது; ஆனால், ஹமாஸ் பற்றி எதுவும் குறிப்பிட்டதாக இல்லை.

அமெரிக்க ஆதரவு கொண்ட முன்மொழிவுக்கு ஹமாஸ் நல்ல மனப்பான்மையில் பதிலளித்தது என்று அல்ஜஸீரா செய்தி வெளியிட்டிருந்தாலும், “21-நிபந்தனைகள் இருசாராரராலும் ஏற்றுக் கொள்ளப்பட்டது” என்ற உறுதி செய்யும் தகவல் அங்கு கூடக் காணப்படவில்லை.

இஸ்ரேலிய செய்தி வலைத்தளமான YNetNews அந்த 21 முன்மொழிவின் சில விவரங்களை வெளியிட்டு, “காஸாவில் ஹமாஸ் அதிகாரத்தை மாற்றுதல்... இஸ்ரேல் படையினர் படிப்படியாகப் பின்வாங்குதல்... மீட்பு அதிகார நிர்வாகம்...போன்ற அம்சங்களை உள்ளடக்கியதாக எழுதுகின்றது.

இந்த 21 முன்மொழிவை ஹமாஸ் உருப்படியாகப் பெறவில்லை என்று கூறுகின்றது. முன்மொழிவின் விவரங்கள், அமுலாக்கக் காலங்கள், கண்காணிப்பு அமைப்புகள், தனி நிபந்தனைகள் போன்றவற்றில் முக்கிய குழப்பங்கள் உள்ளன; “முழுமையான ஒப்புதல்” என்ற நிலை உறுதி செய்ய இயலாத நிலையில்தான் பல ஊடகங்கள் எழுதுகின்றன. அதனால், இந்த 21 நிபந்தனைகள் என்பது ஒரு முன்மொழிவு நிலையில் உள்ளது; அதிலுள்ள மொத்த நிபந்தனைகள் இருசாராரும் ஒப்புக்கொண்டதாக உறுதியாகச் சொல்லும் நிலையில் இல்லை!

செம்மைத்துளியான்.