142க்கு ஆல் அவுட்.. தீக்சனா சாதனை ஹாட்ரிக் வீண்.. இலங்கையை சுருட்டிய நியூஸிலாந்து அடுத்தடுத்த வெற்றி

நியூசிலாந்து மண்ணில் இலங்கை கிரிக்கெட் அணி 3 போட்டிகள் கொண்ட ஒருநாள் தொடரில் விளையாடி வருகிறது. அந்தத் தொடரின் முதல் போட்டியில் நியூசிலாந்து வென்ற நிலையில் இரண்டாவது போட்டி ஜனவரி 8ஆம் தேதி ஹமில்டன் நகரில் நடைபெற்றது. மழையால் இரு தரப்புக்கும் தலா 37 ஓவர்களாக குறைக்கப்பட்ட அந்தப் போட்டியில் டாஸ் வென்ற இலங்கை முதலில் பந்து வீசுவதாக அறிவித்தது.

அதைத் தொடர்ந்து களமிறங்கிய நியூசிலாந்துக்கு வில் எங் 16 ரன்களில் அவுட்டானார். ஆனால் இரண்டாவது விக்கெட்டுக்கு 112 ரன்கள் பார்ட்னர்ஷிப் அமைத்து அசத்திய ரச்சின் ரவீந்திரா அதிரடியான அரை சதம் அடித்து 79 (63) ரன்கள் குவித்து அவுட்டானார். அவருடன் சேர்ந்து விளையாடிய மார்க் சேப்மன் தன்னுடைய பங்கிற்கு அரை சதத்தை அடித்து 62 (52) ரன்கள் குவித்து அவுட்டானார்.

மிடில் ஆர்டரில் டாம் லாதம் 1, கிளன் பிலிப்ஸ் 22 ரன்களில் அவுட்டாகி ஏமாற்றத்தை கொடுத்தனர். அதே போல 35வது ஓவரின் 5, 6வது பந்துகளில் கேப்டன் மிட்சேல் சான்ட்னர் 20, நேதன் ஸ்மித்தை 0 ரன்களில் அவுட்டாக்கிய மஹீஸ் தீக்சனா 37வது ஓவரின் முதல் பந்தில் மாட் ஹென்றியை 1 ரன்னில் அவுட்டாக்கினார். அந்த வகையில் 3 பந்துகளில் 3 விக்கெட்டுகள் எடுத்த அவர் ஒருநாள் கிரிக்கெட்டில் ஹாட்ரிக் விக்கெட்டுகளை எடுத்த 7வது இலங்கை பவுலராக சாதனை படைத்தார்.

மேலும் சமீந்தா வாஸ் (2003), லசித் மலிங்கா (2007), துஷ்மந்தா மதுசங்கா (2018) ஆகியோருக்கு பின் வெளிநாட்டு மண்ணில் ஹாட்ரிக் எடுத்த 4வது இலங்கை பவுலராகவும் அவர் சாதனை படைத்தார். இறுதியில் டேரில் மிட்சேல் 38 (38) ரன்கள் எடுத்த உதவியுடன் 37 ஓவரில் நியூசிலாந்து 255-9 ரன்களை குவித்தது. இலங்கைக்கு அதிகபட்சமாக தீக்சனா 4, ஹஸரங்கா 2 விக்கெட்டுகளை எடுத்தார்கள்.

பின்னர் 256 ரன்களை துரத்திய இலங்கை ஆரம்பம் முதலே நியூசிலாந்தின் நல்ல பந்து வீச்சில் சுமாராக விளையாடி 30.2 ஓவரில் 142 ரன்களுக்கு ஆல் அவுட்டானது. நிஷாங்கா 1, பெர்னாண்டோ 10, குசால் மெண்டிஸ் 2, கேப்டன் அசலங்கா 4 ரன்களில் அவுட்டாகி ஏமாற்றத்தை கொடுத்தார்கள். அதனால் அதிகபட்சமாக கமிண்டு மெண்டிஸ் 64 ரன்கள் எடுத்தும் இலங்கை தோல்வியை தவிர்க்க முடியவில்லை.

அதனால் 113 ரன்கள் வித்தியாசத்தில் வென்ற நியூஸிலாந்து 2 – 0* (3) என்ற கணக்கில் இத்தொடரை ஆரம்பத்திலேயே கைப்பற்றியுள்ளது. அந்த அணிக்கு அதிகபட்சமாக வில்லியம் ஓ’ரோர்கே 3, ஜேக்கப் டுபி 2 விக்கெட்டுகளை வீழ்த்தினார்கள். ரச்சின் ரவீந்திரா ஆட்டநாயகன் விருதை வென்றார்.

crictamil