சூடாக்கப்படும் இனவாதம்

முஸ்லிம் சமூகத்தில் ஏற்படும் பிரச்சனைகள் நெருக்கடிகள் சம்பந்தமாக ஆராய்வதற்காக இரண்டு மாதத்துக்கு ஒரு முறை, முஸ்லிம் அமைப்புகள் அரச தரப்புடன் கலந்தாலோசித்து அவற்றை நிவர்த்தி செய்து கொள்வதற்கான வாய்ப்பு அரசாங்கத்தினால் வழங்கப்பட்டுள்ளது.

அந்த அடிப்படையில் கடந்த வாரம் இது சம்பந்தமான கூட்டம் அமைச்சர் விஜிதஹ அவர்களின் தலைமையில் நடைபெற்றது. இக்கூட்டத்தில் 15 முஸ்லிம் அமைப்புகள் கலந்து கொண்டு முஸ்லிம் சமூகம் எதிர் நோக்கும் பிரச்சனைகள் பற்றி ஆராயப்பட்டது.

இதன் போது இரண்டு முக்கிய விடயங்கள் தொடர்பில் கலந்தாலோசிக்கப்பட்டது.

1. அரச வைத்தியசாலைகளில் பணிபுரியும் முஸ்லிம் தாதியர்களுக்கு இஸ்லாமிய கலாச்சார உடை தொடர்பான பிரச்சினைகள்.

2. ஜனாஸாக்கள் தாமதமாகும் பிரச்சனைகளை பற்றி ஆராய்ந்து அதற்கான வழிமுறைகளை கையாளவும் இங்கு அமைச்சர் விஜித ஹேரத் மற்றும் முஸ்லிம் சிவில் சமூகத் தலைவர்களிடையே கலந்துரையாடப்பட்டது.

அமைச்சில் நடைபெற்ற கூட்டத்தில் கருத்து தெரிவித்த அமைச்சர்

முஸ்லிம் தாதியர்கள் உத்தியோகபூர்வ கடமைகளைச் செய்யும்போது அவர்களின் கலாசார மற்றும் மத விழுமியங்களுக்கு ஏற்ப ஆடை அணிவதைத் தடுக்கும் எந்த சட்டக் கட்டுப்பாடும் இல்லை என்று அமைச்சர் ஹேரத் கூறினார்.

மேலும் இது சம்பந்தமாக கெடுபிடிகள் ஏற்படும் இடத்து அரசை தரப்புக்களுடன் இதை பேசி தீர்த்துக் கொள்ள முடியும் என்றும் தெரிவித்தார்.

இதனைத் தொடர்ந்து இதை ஒரு பேசு பொருளாக எடுத்த இனவாதிகள், இதை ஏற்றுக்கொள்ள முடியாது என்றும் இவ்வாறான ஒரு சலுகை வழங்கப்படக் கூடாது என்றும் போர் கொடி தூக்கத் தொடங்கியுள்ளனர்.

இது சம்பந்தமாக எதிர்ப்புக்களை காட்டியவர்களின் வரலாறுகளை நோக்கும்போது, கடந்த இனவாத அரசாங்கங்களின்போது

இனவாதத்தை விளைவிக்க, இனவாதத்தை மக்களிடம் கொண்டு செல்ல நியமிக்கப்பட்டவர்களே இதன் பின்னணியில் இருப்பதை தெரிந்து கொள்ள முடிகிறது.

இந்தக் குறுகிய காலத்திற்கு செயல்பட்ட இவர்கள் தற்போது இதை ஊதிப் பெரிதாக்கும் முயற்சிகளில் ஈடுபட்டு வருகின்றனர்.

இது விடயத்தில் இதுவரையிலும் கண்டு கொள்ளாமல் மௌனமாக இருந்த இதன் முக்கிய பங்காளிகளான தாதியர் சங்கத்தினர் இதனை எதிர்த்து அறிக்கை ஒன்றை நேற்று வெளியிட்டுள்ளனர்.

இந்த அறிக்கையில் இலங்கையில் காணப்படும் தாதியர் உடை, சர்வதேச தரத்திலான ஒரு உடை என்றும் இதை மாற்றுவதில் தங்களின் எதிர்ப்பை தெரிவிப்பதாகவும், தாதியர் உடை சம்பந்தமாக முஸ்லிம்களுக்கென தனியான விஷேட சுற்று நிரூபங்கள் இல்லை என்றும் அதில் தெவித்துள்ளனர்.

இந்தக் கலந்துரையாடலில் பிரதி சபாநாயகர் ரிஸ்வி சாலி, அமைச்சர் சுனில் செனவி, பிரதியமைச்சர்கள் முனீர் முலாஃபர் மற்றும் அர்காம் இல்லியாஸ் மற்றும் நாடாளுமன்ற உறுப்பினர் ஃபாஸ்மிம் ஷெரிப் ஆகியோரும் கலந்து கொண்டனர்.

எனவே இவ்வாறான இனவாத மேல் எழுச்சிகளை உரிய தரப்புகள் முளையிலே கிள்ளி எறிய தவறுமாயின் நாட்டில் மீண்டும் இனவாத தோற்றத்தின் பெரியதொரு ஆரம்பமாக அமையும்.

பேருவளை ஹில்மி