வேணும்னே இப்படி பண்றாங்க.. முகமது ஷமியின் நீக்கம் குறித்து வருத்தம் தெரிவித்த

இந்திய கிரிக்கெட் அணியின் நட்சத்திர வேகப்பந்து வீச்சாளரான முகமது ஷமி கடந்த சில ஆண்டுகளாகவே காயத்தால் தொடர்ந்து பாதிக்கப்பட்டு வருவதால் முதன்மை இந்திய அணியில் நிராகரிக்கப்பட்டு வருகிறார். ஆனாலும் தனது உடற்தகுதியை மேம்படுத்திக் கொண்ட அவர் ரஞ்சி கோப்பை தொடரில் விளையாடி 3 ஆட்டங்களில் விளையாடி 18 விக்கெட்டுகளை கைப்பற்றிய பின்னர் மீண்டும் தனது கம்பேக் வாய்ப்புக்காக கடந்த சில தொடர்களாகவே காத்திருக்கிறார்.

ஆனால் இங்கிலாந்து மற்றும் வெஸ்ட் இண்டீஸ் அணிகளுக்கு எதிரான டெஸ்ட் தொடரில் வாய்ப்பு கிடைக்காத அவர் ஏமாற்றத்தை சந்தித்திருந்த வேளையில் நிச்சயம் தென்னாப்பிரிக்க அணிக்கு எதிரான டெஸ்ட் தொடருக்கான இந்திய அணியில் வாய்ப்பு கிடைக்கும் என்று எதிர்பார்த்தார்.

ஆனால் நேற்று வெளியான தென்னாப்பிரிக்க தொடருக்கான இந்திய டெஸ்ட் அணியில் மீண்டும் முகமது ஷமிக்கு வாய்ப்பு மறுக்கப்பட்டுள்ளது. இதன் காரணமாக மீண்டும் ஒருமுறை அவர் மிகப்பெரிய ஏமாற்றத்தை சந்தித்துள்ளார். இந்நிலையில் இந்திய டெஸ்ட் அணியில் முகமது ஷமி நிச்சயம் இடம்பெற வேண்டிய வீரர் என்றும் அவரை வேண்டுமென்றே இந்திய அணியின் நிர்வாகம் புறக்கணிப்பதாக பல்வேறு குற்றச்சாட்டுகள் இருந்து வருகின்றன.

இந்நிலையில் இந்த விவகாரம் குறித்து பேசியுள்ள முகமது ஷமியின் சிறுவயது பயிற்சியாளரான முகமது பத்ருதீன் அளித்துள்ள பேட்டியில் தனது விரக்தியை வெளிப்படுத்தி உள்ளார். அந்த வகையில் அவர் கூறியதாவது : இந்திய அணியின் தேர்வாளர்கள் வேண்டுமென்றே முகமது ஷமியை புறக்கணிக்கிறார்கள் என்பது தெளிவாக தெரிகிறது.

அவர் இந்திய அணிக்காக விளையாடக்கூடிய தகுதியான ஒரு வீரர். தேர்வுக்குழுவினர் அவரைக் கண்டும் காணாமல் இருப்பது ஏன்? என்பது எனக்கு சுத்தமாக புரியவில்லை. தேர்வுக்குழுவினர் தான் இதற்கு ஒரு முடிவை சொல்ல வேண்டும். இந்திய டெஸ்ட் அணியை பொறுத்தவரை ரஞ்சி டிராபியில் சிறப்பாக விளையாடியுள்ள ஷமிக்கு அவர்கள் வாய்ப்பினை வழங்கியிருக்க வேண்டும். ஆனாலும் அவர்கள் தொடர்ச்சியாக அவரை நிராகரித்து வருகிறார்கள்.

இருந்தாலும் முகமது ஷமி இதற்கெல்லாம் சோர்ந்து போகாமல் நிச்சயம் இந்திய அணிக்கு கம்பேக் கொடுப்பார் என்பதை நான் முழுமையாக நம்புகிறேன். இன்றளவும் தனது பௌலிங் ஃபார்மில் மிகச் சிறப்பாக இருக்கும் அவர் 100% அர்ப்பணிப்பை வழங்குகிறார். நிச்சயம் அவர் இந்திய அணிக்கு மீண்டும் வருவார் என்று அவர் பேசியுள்ளது குறிப்பிடத்தக்கது.

crictamil