திருக்குறள் விளக்கம்- திருநெவேலி குரலில்-42

குறள் 310

இறந்தார் இறந்தார் அனையர் சினத்தைத்

துறந்தார் துறந்தார் துணை

எடுத்ததுக்கெல்லாம் ரொம்ப கோவப்படுதவங்க இருக்காங்களே.. அவங்கள்ளாம் உயிரில்லாத பிணத்துக்குச் சமமானவங்க மாப்ள. 

கோவத்தை முழுசும் விட்டுத் தொலைத்தவர்கள், துறவிகளுக்குச் சமமானவங்க மாப்ள. 

குறள் 313

செய்யாமல் செற்றார்க்கும் இன்னாத செய்தபின்

உய்யா விழுமந் தரும்.

மாப்ள.. யாருக்கும், எந்த கெடுதலும் செய்யாத ஒருத்தனுக்கு, வேற யாராவது கெடுதல் செஞ்சா அவனுக்கு கோவம் வரத்தான் செய்யும்.  அதுக்காக பதிலுக்கு எதும் கெடுதல் செஞ்சா  அது அவனுக்கு தப்பிக்க முடியாத அளவு தும்பந் தரும் மாப்ள.

குறள் 317

எனைத்தானும் எஞ்ஞான்றும் யார்க்கும் மனத்தானாம்

மாணாசெய் யாமை தலை.

தம்பி... எம்புட்டு கொஞ்சம்னாலும், எந்தக் காலத்துலியும், யாரையும், அசிங்கப் படுத்துத மாதிரி இருக்க செயலை மனசுல நெனைச்சுப் பாக்காம இருக்கணும். அப்பிடி இருந்துட்டா, அது ரொம்ப சிறப்பானது தம்பி. 

குறள் 323

ஒன்றாக நல்லது கொல்லாமை மற்றதன்

பின்சாரப் பொய்யாமை நன்று.

தம்பி... அறங்கள்லேயே சிறந்தது அடுத்த உயிர்களை கொல்லாம இருக்கதுதான்.. அதுக்கு அடுத்த இடம் பொய் சொல்லாம நடக்கதுக்குத் தான் தம்பி.. 

குறள் 330

உயிருடம்பின் நீக்கியா ரென்ப செயிருடம்பின்

செல்லாத்தீ வாழ்க்கை யவர்

மாப்ள... கையில சல்லிக் காசு இல்லாம, ஒடம்புலயும் ஏகப்பட்ட சீக்கோட ஒருத்தன் கேவலமான நிலையில் இருக்காமுன்னா அதுலயிருந்து நாம ஒண்ணு தெரிஞ்சிக்கலாம். 

அதாவது அவன் இதுக்கு முந்தி பல பேரோட உயிரை எடுத்திருப்பான் மாப்ள.

(தொடரும்)