இன்னும் எவ்ளோ நாள் தான் வெயிட் பண்ணனும்.. முகமது ஷமி விடயத்தில் பி.சி.சி.ஐ-யை விளாசிய ரவி சாஸ்திரி

இந்திய கிரிக்கெட் அணியின் முன்னணி வேகப்பந்து வீச்சாளரான முகமது ஷமி இந்தியாவில் கடந்த 2023-ஆம் ஆண்டு நடைபெற்ற 50 ஓவர் உலகக்கோப்பை தொடரில் விளையாடியிருந்தார். அந்த தொடருக்கு பின்னர் கணுக்காலில் ஏற்பட்ட காயம் காரணமாக அவதிப்பட்ட வந்த அவர் லண்டன் சென்று அறுவை சிகிச்சை மேற்கொண்டார். அதன் பிறகு கடந்த ஓராண்டிற்கும் மேலாக எவ்வித போட்டிகளிலும் விளையாடாமல் இருக்கும் முகமது ஷமி தற்போது தான் மெல்ல மெல்ல போட்டிகளில் விளையாடி வருகிறார்.

இந்தியாவில் தற்போது நடைபெற்று வரும் விஜய் ஹசாரே தொடருக்கான பெங்கால் அணியில் விளையாடி வரும் அவர் இன்னும் இந்திய அணிக்கு எப்போது திரும்புவார்? என்பது உறுதியாகவில்லை. ஏற்கனவே தேசிய கிரிக்கெட் அகாடமியில் சிகிச்சை மேற்கொண்டு வந்த அவர் ஆஸ்திரேலிய அணிக்கு எதிரான பார்டர் கவாஸ்கர் டெஸ்ட் கிரிக்கெட் தொடரின் இரண்டாம் பாதியில் இந்திய அணியுடன் இணைவார் என்று எதிர்பார்க்கப்பட்டது.

ஆனால் அப்போதும் கணுக்காலில் வீக்கம் ஏற்பட்டதன் காரணமாக அவர் இந்த ஆஸ்திரேலியா தொடரில் விளையாட முடியாமல் போனது. முகமது ஷமி ஆஸ்திரேலியா பயணிக்காததால் அது இந்திய அணிக்கும் பின்னடைவை ஏற்படுத்தியிருந்தது. இந்நிலையில் முகமது ஷமி எப்போதுதான் இந்திய அணிக்கு திரும்புவார் என்று ரவி சாஸ்திரி சில காட்டமான கருத்துக்களை பகிர்ந்துள்ளார்.

இது குறித்து பேசிய அவர் கூறுகையில் : முகமது ஷமி விடயத்தில் பிசிசிஐ என்ன செய்கிறது? என்பது எனக்கு புரியவில்லை. ஏனெனில் முன்னணி வேகப்பந்து வீச்சாளராக திகழ்ந்துவரும் முகமது ஷமி இந்திய அணிக்கு பெரிய பங்கினை வழங்கக்கூடிய முக்கிய பந்துவீச்சாளர். அவரை இவ்வளவு மாதங்களாக கண்காணித்து வரும் மருத்துவ குழுவால் ஏன் இன்னும் அவரது காயத்தை முழுமையாக சரி செய்ய முடியவில்லை.

அவரது விடயத்தில் பிசிசிஐ எந்த ஒரு தகவலையும் வெளிப்படையாக அறிவிக்கவில்லை. அவர்கள்தான் முகமது ஷமியை கண்காணித்து விரைவில் குணப்படுத்தியிருக்க வேண்டும். முகமது ஷமி இருந்திருந்தால் ஆஸ்திரேலியாவில் பும்ரா மற்றும் சிராஜ் ஆகியோருக்கு உதவியாக இருந்திருக்கும். ஆனால் அவர் இல்லாதது இந்திய அணிக்கு பெரிய பின்னடைவை ஏற்படுத்தி உள்ளது.

தற்போது உள்ளூர் தொடரில் முகமது ஷமி விளையாடி வந்தாலும் அவர் தேசிய அணிக்கு திரும்புவாரா? என்பது குறித்து இன்னும் புரியாமல் இருக்கிறது. பிசிசிஐ அவர்கள் விடயத்தில் என்ன நினைக்கிறது? என்பதை எனக்கு தெரியவில்லை என ரவி சாஸ்திரி கூறியது குறிப்பிடத்தக்கது.

crictamil