இந்த ஜென்டில்மேன் பண்பு இந்தியாவுக்கு எங்க தெரியப்போகுது.. நேரலையில் குத்திக் காட்டிய ரமீஸ் ராஜா

பாகிஸ்தானுக்கு சுற்றுப்பயணம் மேற்கொண்டுள்ள தென்னாபிரிக்கா அங்கு 2 போட்டிகள் கொண்ட டெஸ்ட் தொடரில் விளையாடுகிறது. 2027 உலக டெஸ்ட் சாம்பியன்ஷிப் கோப்பையின் அங்கமாக நடைபெறும் அத்தொடரின் முதல் போட்டி அக்டோபர் 12ஆம் தேதி லாகூரில் துவங்கி நடைபெற்றது. அப்போட்டியில் டாஸ் வென்ற பாகிஸ்தான் முதலில் பேட்டிங் செய்து 378 ரன்கள் குவித்தது.

அதிகபட்சமாக இமாம்-உல்-ஹக் 93, சல்மான் ஆகா 93 ரன்கள் எடுத்த நிலையில் தென்னாப்பிரிக்காவுக்கு அதிகபட்சமாக சேனுரான் முத்துசாமி 6 விக்கெட்டுகளை எடுத்தார். அடுத்ததாக விளையாடிய தென்னாப்பிரிக்காவை சிறப்பாக பந்து வீசிய பாகிஸ்தான் 269 ரன்களுக்கு சுருட்டி முன்னிலை பெற்றது. அதிகபட்சமாக டோனி டீ ஜோர்ஸி சதத்தை அடித்து 104 ரன்கள் எடுத்த நிலையில் பாகிஸ்தானுக்கு அதிகபட்சமாக நோமன் அலி 6 விக்கெட்டுகளை எடுத்தார்.

அடுத்ததாக 109 ரன்கள் முன்னிலையுடன் விளையாடிய பாகிஸ்தானை 167 ரன்களுக்கு தென்னாப்பிரிக்கா சுருட்டி வீசியது. அதிகபட்சமாக பாபர் அசாம் 42, அப்துல்லா ஷபிக் 41 ரன்கள் எடுத்த நிலையில் தென்னாபிரிக்காவுக்கு அதிகபட்சமாக சேனுரான முத்துசாமி 5 விக்கெட்டுகளை எடுத்தார். இறுதியில் 277 ரன்களை தென்னாபிரிக்கா சுழலுக்கு சாதகமான பிட்ச்சில் 183 ரன்களுக்கு ஆல் அவுட்டாகி தோல்வியை சந்தித்தது.

அதிகபட்சமாக தேவால்ட் ப்ரேவிஸ் 54 ரன்கள் எடுத்த நிலையில் பாகிஸ்தானுக்கு அதிகபட்சமாக ஷாகின் அப்ரிடி, நோமென் அலி தலா 4 விக்கெட்டுகள் எடுத்தனர். அதனால் 93 ரன்கள் வித்தியாசத்தில் வெற்றி பெற்ற பாகிஸ்தான் இத்தொடரில் 1 – 0* (2) என்ற கணக்கில் முன்னிலைப் பெற்று அசத்தியது. அப்போட்டியின் முடிவில் தென்னாப்பிரிக்க அணியுடன் பாகிஸ்தான் அணியினர் கை குலுக்கினார்கள்.

அதை நேரலையில் பார்த்த முன்னாள் பாகிஸ்தான் வீரர் ரமீஸ் ராஜா. “இதெல்லாம் ஜென்டில்மேன் வெளிப்படுத்தக்கூடிய பண்பு. இது எங்கே இந்தியாவுக்கு தெரியப் போகிறது” என்ற வகையில் மறைமுகமாக குத்திக்காட்டினார். இது பற்றி நேரலை வர்ணனையில் அவர் பேசியது பின்வருமாறு. “இது ஒரு சிறந்த பாரம்பரியம். கிரிக்கெட் என்பது பாரம்பரியத்தைப் பொறுத்தது. ஜென்டில்மேனாக நியாயமாக இருப்பதைப் பற்றியது. எனவே தென்னாப்பிரிக்கா விவேகத்துடன் இருப்பது முக்கியம்” என்று கூறினார்.

அதாவது சமீபத்தில் பாகிஸ்தானை சேர்ந்தவர்கள் நிகழ்த்திய தாக்குதலில் 26 இந்தியர்கள் இயற்கை எய்தினர். அதற்கு பதிலடியாக கடந்த ஆசியக் கோப்பையில் பாகிஸ்தான் அணியுடன் இந்தியா கை குலுக்கவில்லை. ஆனால் தென்னாப்பிரிக்க அணி இந்தியாவை போல் அல்லாமல் பாகிஸ்தானுடன் ஜென்டில்மேன் பண்பை வெளிப்படுத்தியதாக அவர் நேரலையில் விமர்சித்தது குறிப்பிடத்தக்கது.

crictamil