மரியா கொரினா மச்சாடோ தனது அமைதிக்கான நோபல் பரிசினை ட்ரம்ப்புக்காக சமர்ப்பணம் செய்கின்றார்!

அமெரிக்க ஜனாதிபதியாக இரண்டாவது முறையாகப் பதவியேற்ற டொனால்ட் ட்ரம்ப், அமைதிக்கான நோபல் பரிசு தனக்கு வழங்கப்பட வேண்டுமென நீண்ட காலமாக வற்புறுத்தி வந்தார்.

அதற்கான அரிய சந்தர்ப்பமாக இஸ்ரேஸ்-ஹமாஸ் போரை அவர் பயன்படுத்திக் கொள்ள விளைந்தபோதிலும், அந்த வாய்ப்பு அவருக்குக் கிடைக்கவில்லை.

2025 ஆண்டு அமைதி விருதுக்காக, டொனால்ட் ட்ரம்ப் போன்ற சில தலைவர்கள் உட்பட 338 பேர்கள் பரிந்துரைக்கப்பட்டுள்ளனர்.

அவர்களுள், வெனிசுலாவின் ஜனநாயக போராட்டத்தின்

தூணாக மதிக்கப்பட்டுவந்த மரியா கொரினா மச்சாடோ (María Corina Machado)பரிசினைத் தட்டிக் கொண்டது மட்டுமல்லாது, தனக்குக் கிடைத்த பரிசை அமெரிக்க ஜனாதிபதி டொனால்ட் ட்ரம்ப்புக்கு அர்ப்பணிப்பதாக எக்ஸ் சமூக வலைதளத்தில் பதிவிட்டுள்ளார்.

வெனிசுலாவின் முக்கிய எதிர்க்கட்சி தலைவரும், ஜனநாயக உரிமைகளுக்கான அயராத போராட்டக்காரருமான 58 வயது கொண்ட தொழில்நுட்ப பொறியாளர் இவராவார்.

நோர்வே நோபல் கமிட்டி அவருக்கு "வெனிசுலா மக்களுக்கான ஜனநாயக உரிமைகளை ஊக்குவிக்கும் அயராத பணிக்கும், அதிபதியாக்கத்திலிருந்து நியாயமான மற்றும் அமைதியான மாற்றத்தை அடைவதற்கான போராட்டத்திற்குமாக, இந்த அமைதிக்கான நோபல் பரிசினை வழங்கியுள்ளது.

இந்தப் பரிசு அவரது சமாதானத்தின் மூலம் ஜனநாயகத்தை பாதுகாக்கும் தைரியத்தை அங்கீகரிக்கின்றது.

1967 அக்டோபர் 7 அன்று கராகஸ் நகரில் பிறந்த மச்சாடோ, தொழில்நுட்பப் பொறியியல் பட்டம் பெற்றவர்; வெனிசுலாவின் பழமையான குடும்பங்களில் ஒன்றான மார்கிஸ் ஆஃப் டோரோவின் வம்சாவளியைச் சேர்ந்தவர்.

2000களின் தொடக்கத்தில், வாக்கெடுப்பு கண்காணிப்பு அமைப்பான சூமேட்டே (Súmate) அமைப்பைத் தொடங்கிய இவர், இதன் மூலம் வெனிசுலாவின் தேர்தல் செயல்முறைகளை கண்காணித்து, ஜனநாயகத்தை வலுப்படுத்தினார்.

மச்சாடோ, வெனிசுலாவின் அதிபர் நிக்கோலாஸ் மதுரோவின் அதிபதியாக்க ஆட்சிக்கு எதிராக 20 ஆண்டுகளுக்கும் மேலாக போராடி வருகிறார். அவரது பணி, தேர்தல்களை வாக்குகளால் மட்டுமே முடிவு செய்ய வேண்டும் என்பதை வலியுறுத்தி நின்றது.

2010ல் தேசிய சபைக்கு (National Assembly) தேர்ந்தெடுக்கப்பட்டு, சாதனை வாக்கு எண்ணிக்கையுடன் உறுப்பினரான அவரை, 2014ல் அரசு பதவியிலிருந்து நீக்கியது. இதனை அக்கால அரசியல் பழிவாங்கல் என மக்கள் விமர்சித்தனர்.

வென்டே வெனிசுலா (Vente Venezuela) என்ற பெயரில், 2012ல் எதிர்க்கட்சி ஒன்றைத் தொடங்கி, ஜனநாயக சக்திகளை ஒருங்கிணைக்கும் சோய் வெனிசுலா (Soy Venezuela) கூட்டமைப்பை 2017ல் உருவாக்கினார்.

2024 ஜனாதிபதி தேர்தலில் வேட்பாளராக நிறுத்தப்பட்டபோதிலும், அரச நீதிமன்றம் அவரைத் தடை செய்தது. அதன் பின், தேர்தல் கட்டுப்பாட்டுக்கு எதிராகப் போராடி பரவலான மக்கள் ஆதரவைப் பெற்றுக் கொண்டார்.

2024ல் சாகரோவ் பரிசு (Sakharov Prize) மற்றும் வாக்லாவ் ஹாவெல் மனித உரிமைகள் பரிசு (Václav Havel Human Rights Prize) ஆகியவற்றைப் பெற்றார். 2018ல் BBCயின் திப்புமிக்க 100 பெண்கள் பட்டியலில் இடம்பெற்றதோடு, 2025ல் TIME இதழின் 100 செல்வாக்குமிக்கோர் பட்டியலிலும் இடம்பிடித்தார்.

2025 அக்டோபர் 10ல் அறிவிக்கப்பட்ட இந்த அமைதிக்கான நோபல் பரிசு பெறும் மச்சாடோ பற்றி நோபல் கமிட்டி தலைவர் ஜோர்கன் வாட்னே ஃப்ரிட்னெஸ் கூறுகையில், "அவர் ஜனநாயகத்தின் தீப்பொறியை வளர்ந்து கொண்டிருக்கும் இருளில் ஏற்றி வைத்திருக்கிறார்" என்றார். இது ஆல்ஃப்ரெட் நோபலின் விருப்பப்படி, அடக்குமுறைக்கு எதிரான தைரியத்தை அங்கீகரிக்கிறது.

கடந்த ஆண்டு, அவர் மறைந்திருந்து வாழ வேண்டியிருந்தபோதிலும், அரசின் அடாவடித்தனங்களுக்கு மத்தியிலும் வெனிசுலாவின் எதிர்க்கட்சிகளை ஒன்றிணைத்து, சர்வதேச அழுத்தத்தை ஏற்படுத்தினார்.

அவருக்குக் கிடைத்த இந்தப் பரிசு வெனிசுலாவின் தேர்தல் மோசடி மற்றும் மனித உரிமை மீறல்களுக்கு உலக கவனத்தை ஈர்க்க வைக்கும் என்பதில் ஐயமில்லை!

அவரது போராட்டம், லத்தீன் அமெரிக்காவில் சமாதான எதிர்ப்பின் சிறந்த எடுத்துக்காட்டாகக் கருதப்படுகிறது. மச்சாடோவின் வாழ்க்கை, "ஜனநாயகம் என்றால் அமைதி" என்பதை உணர்த்துகிறது. அவரது தைரியம், வெனிசுலாவின் எதிர்காலத்திற்கு நம்பிக்கையை ஏற்படுத்த நல்வாழ்த்துக்கள்!

அடுத்த வருடமாவது உலக அமைதிக்கான நோபல் பரிசினை ரஷ்யாவின் யூலியா நவல்னையாவைத் தட்டிச் செல்லவிடாமல், நல்லெண்ணத்துடன் உலக அமைதிக்கான நன்முயற்சிகளை அமெரிக்காவின் அதிபர் டரம்ப் மேற்கொள்வதுடன், பாலஸ்தீனத்தின் அமைதியை எதிர்காலத்தில் பாதுகாப்பார் என்ற நம்பிக்கையை சர்வதேசத்துக்கு அவர் நிரூபிக்க வேண்டும்!

செம்மைத்துளியான்