இம்முறை இலங்கை மக்களுக்கான ஹஜ் கடமை கைவிட்டுப் போகுமா ? ஜனாதிபதியின் அவதானத்திற்கு !

கடந்த காலங்களில் தேர்தல் வெற்றிக்காக உழைத்த, எந்தவித தகைமையும் அற்றவர்களுக்கு பரிசாக வழங்கப்பட்ட ஹஜ் கமிட்டி பதவிகள் அவர்களிடமிருந்து பறிக்கப்பட்டு, சிறந்த ஒரு ஹஜ் கமிட்டியை புதிய அரசாங்கம் நியமித்தது. இதனால் ஒரு தசாப்தங்களுக்கு மேலாக நீதிமன்றம் ஏறி இறங்கிய ஹஜ் விவகாரம், பல வருடங்களுக்குப் பின்பு சென்ற முறை எந்த பிரச்சினையும் இல்லாமல் நீதமாக செயல்பட்டது. ஆனால் இம்முறை இலங்கை மக்கள் ஹஜ் செல்வது ஒரு கேள்விக்குறியாகவே காணப்படுகின்றது.

ஒவ்வொரு வருடமும் ஹஜ் கமிட்டிகளுக்கு நேர்முகப் பரீட்சை நடத்தப்பட்டு முகவர்கள் தெரிவு செய்யப்படுகின்றனர். இதே நடைமுறையில் இம்முறையும் நேர்முகப் பரிட்சையை நடாத்த, ஹஜ் கமிட்டி சில அதிகாரிகளை நியமித்திருந்தது. இந்த நேர்முகப் பரீட்சை நடத்திய அதிகாரிகளுக்கு இடையில் சில குளறுபடிகள் நடந்துள்ளதாக தெரிய வருகின்றது.

இம்முறை ஹஜ் முகவர் தேர்வுக்காக, முகவர்களின் கடந்த கால வங்கி நடவடிக்கைகள் நம்பிக்கைத் தன்மைகள் பரிசீலிக்கப்பட்டு (crib) 127 முகவர்கள் அழைக்கப்பட்டு, அதில் 52 முகவர்கள் மாத்திரம் இம்முறை மக்களை ஹஜ் அழைத்துச் செல்வதற்காக தெரிவு செய்யப்பட்டுள்ளனர்.

இதில் கவனிக்கப்பட வேண்டிய விடயம். கடந்த, காலங்களில் 15 முதல் 40 வருடங்கள் எந்தவிதமான முறைப்பாடுகளும் இன்றி, மக்களை ஹஜ்ஜுக்கு அழைத்துச் சென்ற சிறந்த முகவர்கள் உட்பட, 22 முகவர்களை இந்த நேர்முகப் பரீட்சை குழு போதிய காரணங்கள் இன்றி தள்ளுபடி செய்துள்ளது.

மேலும் கடந்த ஹஜ் கடமையின் போது கோட்டாக்களை பெற்று மக்களை ஹஜ்ஜுக்கு அழைத்துச் செல்லாமல், ஒரு வீசாவை மூன்று லட்சங்கள் வீதம் விற்பனை செய்த தள்ளுபடி செய்யப்பட வேண்டிய ஆறு அல்லது ஏழு முகவர்களுக்கு மக்களை ஹஜ்ஜுக்கு அழைத்துச் செல்ல அனுமதி வழங்கப்பட்டுள்ளது.

மேலும் இத்தேர்வின் போது உயர் நீதிமன்றத்தின் ஹஜ் வழிகாட்டல்களின் சில சட்ட திட்டங்கள் மீறப்பட்டுள்ளதாகவும் அறிய கிடைக்கின்றது.

எனவே தற்போது இதனால் பாதிக்கப்பட்ட முகவர்கள் நீதிமன்றத்தின் தயவை நாட தயாராகி வருகின்றனர்.

இதனிடையே பாதிக்கப்பட்ட ஹஜ் முகவர்களுக்கு ஹஜ் கமிட்டியிடம் மேல் முறையீடு செய்யுமாறு ஹஜ் கமிட்டி அறிவித்துள்ளது.

அதே நேரம். ஹஜ் முகவர்களுக்கான முன்பதிவுகளை ஜனவரி மாதம் 17 திகதிக்கு முதல் பூர்த்தி செய்ய வேண்டும் என சவுதி அரேபிய அரசாங்கம் காலம் விதித்து உள்ளது.

இந்நிலையில் இம்முறை ஹஜ்விவகாரம் நீதிமன்றம் விசாரணை என செல்லுமாயின் இம்முறை இலங்கை மக்களுக்கு ஹஜ் செய்யும் வாய்ப்பு கனவாகிப் போகுமா ?

சென்ற வருடம் இந்தியா, பாகிஸ்தான், பங்களாதேஷ், போன்ற நாட்டுகளில், சவுதி அரேபியாவின் காலக்கெடுவை மீறிய சுமார் ஒன்றரை லட்சம் மக்களுக்கு ஹஜ் செய்ய வாய்ப்பு கிடைக்கவில்லை. இந்நிலமை இம்முறை இலங்கை மக்களுக்கு ஏற்படாமல் உடனடியாக இவ்விவகாரத்தில் ஜனாதிபதி தலையிட்டு சிறந்த ஒரு தீர்வை பெற்றுக் கொடுக்க வேண்டும் என முஸ்லிம் சமூகம் எதிர்பார்க்கின்றது.

பேருவளை ஹில்மி