இந்தியாவில் ஓடும் ‘கேன்சர் ரயில்’ பற்றி தெரியுமா? அதிகாரப்பூர்வ பெயரையே மறக்க வைத்த ஒரு நோயின் அடையாளம்!

இந்தியாவின் பஞ்சாப் மற்றும் ராஜஸ்தான் மாநிலங்களுக்கு இடையே இயங்கும் ஒரு ரயில், அதன் அதிகாரப்பூர்வ பெயரைக் காட்டிலும் 'புற்றுநோய் ரயில்' (Cancer Train) என்றே மக்களால் பரவலாக அழைக்கப்படுகிறது.

பஞ்சாபின் பட்டிண்டாவில் இருந்து ராஜஸ்தானின் பிகானேர் வரை செல்லும் 'பட்டிண்டா - பிகானேர் எக்ஸ்பிரஸ்' ரயிலே இவ்வாறு அழைக்கப்படுகிறது.

பிகானேரில் உள்ள ஆச்சார்யா துளசி மண்டல புற்றுநோய் சிகிச்சை மற்றும் ஆராய்ச்சி மையம், வட இந்தியாவின் மிக முக்கியமான மற்றும் குறைந்த கட்டணத்தில் சிகிச்சை அளிக்கும் மையங்களில் ஒன்றாகும். இதன் காரணமாகவே, தினமும் நூற்றுக்கணக்கான புற்றுநோய் நோயாளிகள் தங்கள் உறவினர்களுடன் இந்த ரயிலில் பயணம் செய்கின்றனர்.

இந்த ரயிலுக்கு அரசு இத்தகைய பெயரை சூட்டவில்லை. மாறாக, இந்த ரயிலில் பயணம் செய்யும் பயணிகளில் பெரும்பாலோர் புற்றுநோய் பாதிப்புக்குள்ளானவர்களாக இருப்பதால், காலப்போக்கில் உள்ளூர் மக்களே இதற்கு 'புற்றுநோய் ரயில்' என்று பெயரிட்டுவிட்டனர். இது ஒரு ரயிலின் பெயர் மட்டுமல்ல, ஒரு சமூகத்தின் கசப்பான உண்மையின் அடையாளமாகவும் மாறிவிட்டது.

பஞ்சாபின் மாால்வா பகுதியில் கடந்த சில ஆண்டுகளாக புற்றுநோய் பாதிப்பு அதிகரித்து வருவது பெரும் கவலையை ஏற்படுத்தியுள்ளது.

விவசாயத்தில் ரசாயன உரங்கள் மற்றும் பூச்சிக்கொல்லிகளின் அதிகப்படியான பயன்பாடு, நிலத்தடி நீர் மாசுபடுதல் போன்றவை இதற்கு முக்கியக் காரணங்களாகக் கருதப்படுகின்றன.

போதிய வசதி இல்லாத ஏழை மற்றும் நடுத்தர குடும்பங்கள், அதிக செலவாகும் பெரிய நகரங்களுக்குச் செல்ல முடியாமல், மலிவான சிகிச்சை கிடைக்கும் பிகானேர் மருத்துவமனைக்குச் செல்ல இந்த ரயிலையே நம்பியுள்ளனர்.

இந்த ரயிலில் பயணம் செய்யும் சூழல் பெரும்பாலும் சோகம் நிறைந்ததாகவே இருக்கும். ஒருபுறம் இது நோயின் வலியைச் சுமந்து சென்றாலும், மறுபுறம் இது நோயாளிகளுக்குக் குணமடைவோம் என்ற 'நம்பிக்கையின்' பாதையாகவும் திகழ்கிறது.

தகுந்த மருத்துவ வசதிகள் உள்ளூர் மட்டத்திலேயே கிடைப்பதன் அவசியத்தையும், சுற்றுச்சூழல் பாதுகாப்பின் முக்கியத்துவத்தையும் இந்த ரயில் நமக்கு உணர்த்துகிறது.

'புற்றுநோய் ரயில்' என்பது வெறும் போக்குவரத்து சாதனம் மட்டுமல்ல; அது ஆயிரக்கணக்கான மக்களின் வாழ்வாதாரப் போராட்டத்தையும், மருத்துவத் தேவைகளையும் பிரதிபலிக்கும் ஒரு கண்ணாடியாக உள்ளது என்று சமூக ஆர்வலர்கள் தெரிவிக்கின்றனர்.

news18