ஈரானுக்கு ஆயுத உதவி செய்யும் ரஷ்யா? ஆட்டம் காணப்போகும் உலகப் பொருளாதாரம்!

இது ஒரு நேரடிப் போராக மாறுமா அல்லது ராஜதந்திர ரீதியாக முடிவுக்கு வருமா என்பது வரும் வாரங்களில் எடுக்கப்படும் முடிவுகளைப் பொறுத்தே அமையும்.

ஈரானுக்கு அனைத்து ஆயுத உதவிகளையும் ரஷ்யா செய்துக் கொடுப்பதாக தகவல்கள் வெளியாகியுள்ளன. The Economist பத்திரிகையில் வெளியாகியுள்ள தகவலின்படி, ஈரானுக்கும் ரஷ்யாவிற்கும் இடையே கடந்த ஆண்டு மாஸ்கோவில் ரகசிய ஒப்பந்தம் மேற்கொள்ளப்பட்டது தெரியவந்துள்ளது.

ரஷ்ய அரசுக்குச் சொந்தமான ஆயுத ஏற்றுமதி நிறுவனமான ரோசோபோரோன் எக்ஸ்போர்ட் (Rosoboronexport) மற்றும் ஈரானின் பாதுகாப்பு அமைச்சகத்திற்கும் இடையே ஒப்பந்தம் செய்து கொள்ளப்பட்டுள்ளது. ரஷ்யா, ஈரானுக்கு 500 'Verba' ஏவுகணை ஏவுதளங்களையும், அதனுடன் பயன்படுத்தப்படும் 2,500 '9M336' ஏவுகணைகளையும் வழங்க இந்த ஒப்பந்தம் வழிவகை செய்கிறது. 'Verba' என்பது ரஷ்யாவின் நான்காம் தலைமுறை வான் பாதுகாப்பு அமைப்பாகும். இது வெப்பத்தை உணர்ந்து இலக்குகளைத் தேடிச் செல்லும் (Heat-seeking) திறன் கொண்டது மற்றும் மின்னணு முறையில் திசைதிருப்ப முடியாத (Anti-jamming) தொழில்நுட்பம் கொண்டது.

ஈரானிய தொழில்நுட்ப வல்லுநர்களுக்கு ரஷ்யாவிற்குள்ளேயே இந்த ஆயுதங்களை இயக்குவதற்கான சிறப்புப் பயிற்சிகள் வழங்கப்படும். இந்த ஒப்பந்தம் மிகவும் ரகசியமாக வைக்கப்பட வேண்டும் என்றும், ஏதேனும் மூன்றாம் தரப்பு நாடுகளுக்கு இந்தத் தகவல் கசிந்தால் ஒப்பந்தம் ரத்து செய்யப்படும் என்றும் நிபந்தனை விதிக்கப்பட்டுள்ளது.

ரஷ்யாவின் செயற்கைக்கோள் தரவுகளை ஈரான் பயன்படுத்திக் கொள்வதற்கான ஒரு தனிப்பிரிவும் ஒப்பந்தத்தின் ஒரு பகுதியாக உள்ளது. இந்த ஒப்பந்தத்தில் 500 'மௌக்லி-2' (Mowgli-2) வகை இரவு நேரப் பார்வை வசதி கொண்ட கண்ணாடிகளும் (Night-vision goggles) அடங்கும். இவை ஏவுகணை ஏவுதளங்களை இயக்குபவர்கள் இருட்டிலும் துல்லியமாக இலக்குகளைக் கண்டறிய உதவும்.

ஈரான் ரஷ்யாவிடமிருந்து Mi-28 'நைட் ஹண்டர்' (Night Hunter) ரகத் தாக்குதல் ஹெலிகாப்டர்களை வாங்கியுள்ளதாகவும் கூறப்பட்டுள்ளது. ஜனவரி மாதத்தில் மட்டும் 6 ஹெலிகாப்டர்கள் ஈரான் வசம் ஒப்படைக்கப்பட்டுள்ளன. ஈரானின் வான்படையைப் பலப்படுத்த ரஷ்யாவிடமிருந்து அதிநவீன Su-35 போர் விமானங்களைப் பெறுவதற்கான பேச்சுவார்த்தைகளும், இந்த ராணுவ உறவின் ஒரு பகுதியாகத் தொடர்ந்து நடந்து வருகிறது.

உக்ரைன் போருக்கு ஈரானிய ட்ரோன்கள் உதவியதற்குப் பிரதிபலனாக, ரஷ்யா ஈரானின் வான் பாதுகாப்பு கட்டமைப்பை பலப்படுத்த இந்த உதவியைச் செய்துள்ளது. அமெரிக்கா-ஈரான் இடையேயான மோதல் தற்போது ஒரு "பலவீனமான போர்நிறுத்த" நிலையில் உள்ளது. ஒருபுறம் பாகிஸ்தான் போன்ற நாடுகளின் மத்தியஸ்தத்துடன் பேச்சுவார்த்தை நடந்தாலும், மறுபுறம் ரஷ்யாவின் ராணுவ உதவியுடன் ஈரான் தன்னைத் தயார்படுத்தி வருகிறது. (AI Generated Image)

உலக நாடுகளைப் பொறுத்தவரை, இந்த மோதல் நீடித்தால் அது உலகப் பொருளாதாரத்தில், குறிப்பாக எண்ணெய் சந்தையில் பெரும் பாதிப்பை ஏற்படுத்தும் என்பதே கசப்பான உண்மை. இது ஒரு நேரடிப் போராக மாறுமா அல்லது ராஜதந்திர ரீதியாக முடிவுக்கு வருமா என்பது வரும் வாரங்களில் எடுக்கப்படும் முடிவுகளைப் பொறுத்தே அமையும்.

news18