தி.மு.க தலைவர் இல்லத்திற்கு நேரில் சென்ற முதலமைச்சர் விஜய்! : ஆரத்தழுவி வரவேற்ற மு.க.ஸ்டாலின்!

தமிழ்நாட்டில் பெரும் எதிர்பார்ப்பிற்கு இடையில் நடந்து முடிந்த சட்டமன்றத் தேர்தலில் அதிகப்படியான இடங்களை த.வெ.க வென்றும், பெரும்பான்மையை நிரூபிக்க முடியாமல் தவித்து வந்தது.

பெரும்பான்மையை நிரூபிக்க முடியாவிட்டால் ஆளுநர் வழி குடியரசுத் தலைவர் ஆட்சி அமலுக்கு வந்து, தமிழ்நாட்டை ஒன்றிய பா.ஜ.க அரசு ஆட்கொள்ள நேரிடும் என்ற அச்சுறுத்தலின் பேரில், தி.மு.க தலைவர் மு.க.ஸ்டாலின் அவர்களுடன் கலந்துபேசிய பிறகு, வெளியில் இருந்து த.வெ.க.விற்கு ஆதரவு தருவதாக மதச்சார்பற்ற முற்போக்குக் கூட்டணியில் அங்கம் வகிக்கும் இந்திய கம்யூனிஸ்ட் கட்சி, மார்க்சிஸ்ட் கம்யூனிஸ்ட் கட்சி, வி.சி.க மற்றும் இந்திய யூனியன் முஸ்லீம் லீக் ஆகிய கட்சிகள் அறிவித்தன.

அதனையடுத்து, த.வெ.க தலைவர் என்கிற முறையில் நேற்று (மே 10) சென்னை நேரு உள்விளையாட்டு அரங்கில், முதலமைச்சராக பதவியெற்றுக் கொண்டார் விஜய்.

தொடர்ச்சியாக, இன்று (மே 11) 17ஆவது சட்டப்பேரவைக் கூட்டத்தொடர் தொடங்கி, முறையே முதலமைச்சராக விஜய்யும், எதிர்க்கட்சித் தலைவராக உதயநிதி ஸ்டாலினும் உளமாற உறுதியேற்று பதவியேற்றுக் கொண்டனர்.

அதன் பின், அகர வரிசைப்படி தி.மு.க, அ.தி.மு.க, த.வெ.க உள்ளிட்ட கட்சிகளைச் சேர்ந்த சட்டமன்ற உறுப்பினர்களும் பதவியேற்றுக்கொண்டனர்.

இந்நிலையில், தமிழ்நாட்டின் புதிய முதலமைச்சராக பதவியேற்றுள்ள விஜய், மரியாதை நிமித்தமாக இன்று (மே 11) சென்னை ஆழ்வார்பேட்டையில் உள்ள தி.மு.க தலைவர் மு.க.ஸ்டாலின் இல்லத்திற்கு நேரில் சென்று வாழ்த்து பெற்றார்.

அப்போது, தமிழ்நாடு சட்டமன்ற எதிர்க்கட்சித் தலைவரும், தி.மு.க இளைஞர் அணிச் செயலாளருமான உதயநிதி ஸ்டாலின், முதலமைச்சர் விஜய்யை வாசல் வரை சென்று கட்டியணைத்து வரவேற்று, இல்லத்திற்கு அழைத்துச் சென்றார்.

அதனைத் தொடர்ந்து தி.மு.க தலைவர் மு.க.ஸ்டாலினும் வாழ்த்துபெற வந்த முதலமைச்சர் விஜய்யை ஆரத்தழுவி வரவேற்று பொன்னாடைப் போர்த்தி, வாழ்த்துகளை தெரிவித்தார்.

எதிர்க்கட்சித் தலைவர் உதயநிதி ஸ்டாலின், தி.மு.க.வின் 75 ஆண்டுகால வரலாற்றுப் பயணத்தை பறைசாற்றும் வகையில் கொண்டுவரப்பட்ட ‘காலத்தின் நிறம் கருப்பு சிவப்பு - தி.மு.க 75’ என்ற நூலை முதலமைச்சர் விஜய்க்கு அன்பளிப்பாக வழங்கினார்.

kalaignarseithigal