நகரத்தின் மிகப்பெரிய நீதிமன்றம் அன்று மக்கள் கூட்டத்தால் நிரம்பியிருந்தது.
காரணம்?
ஒரு மனிதன் வழக்கு தொடர்ந்திருந்தான்.
ஆனால் அந்த வழக்கின் குற்றவாளி மனிதன் அல்ல.
ஒரு ரோபோ.
இல்லை...
அதையும் தாண்டி, இணையம், சமூக ஊடகங்கள், செயற்கை நுண்ணறிவு ஆகிய அனைத்தையும் பிரதிநிதித்துவப்படுத்தும் "(அறிவொளி) என்ற ரோபோ.
"மாண்புமிகு நீதிபதியே!" என்று வழக்குத் தொடர்ந்தவன் எழுந்தான்.
"இந்த AI-களும், இணையங்களும், சமூக ஊடகங்களும் தான் இன்றைய சீர்கேட்டுக்குக் காரணம்.தவறான தகவல், பொய்கள், ஏமாற்று வேலைகள், நேர விரயம்,எல்லாம் இதனால் தான். இதைத் தடை செய்ய வேண்டும்!"
நீதிமன்றம் அமைதியானது.
நீதிபதி ரோபோவைப் பார்த்தார்.
"உன் பதில் என்ன?"ரோபோ மெதுவாக எழுந்தது.
அதன் குரல் அமைதியாக இருந்தது.
"மாண்புமிகு நீதிபதியே...என்னை கைது செய்திருக்கிறார்கள்.ஆனால் நான் ஒரு கேள்வி கேட்கலாமா?"
"கேள்."
"கத்தி நல்லதா? கெட்டதா?"
அனைவரும் ஒருவரை ஒருவர் பார்த்தார்கள்.
ரோபோ தொடர்ந்தது.
"ஒரு மருத்துவர் அதே கத்தியால் உயிரைக் காப்பாற்றுகிறார்.ஒரு குற்றவாளி அதே கத்தியால் உயிரைப் பறிக்கிறான்.அப்படியென்றால்
குற்றவாளி கத்தியா?"
நீதிமன்றம் அமைதியாக இருந்தது.
"இணையமும் அப்படித்தான்.ஒரு மாணவன் அதில் பாடம் கற்கிறான்.ஒரு விவசாயி புதிய தொழில்நுட்பம் கற்கிறான்.ஒரு நோயாளி மருத்துவரை அடைகிறான்.
ஒரு குடும்பம் ஆயிரம் மைல் தூரத்தில் இருந்தும் பேசுகிறது.அதே நேரத்தில்...ஒருவர் அதை தவறாகப் பயன்படுத்துகிறார்.அதற்காக முழு கருவியும் குற்றவாளியா?"
வழக்குத் தொடர்ந்தவன் எழுந்தான்.
"ஆனால் தவறான படங்கள் உருவாகின்றன!"
ரோபோ சிரித்தது.
"ஒரு காகிதத்தில் கவிதையும் எழுதலாம்.
அதே காகிதத்தில் பொய்யும் எழுதலாம்.
அதற்காக காகிதத்தை கைது செய்வீர்களா?"
நீதிமன்றத்தில் சிரிப்பு எழுந்தது.
ஆனால் ரோபோவின் குரல் இப்போது கனமானது.
"நாங்கள் சேவகர்களே.எங்களுக்கு ஆசை இல்லை.
பொறாமை இல்லை.கோபம் இல்லை.
நாங்கள் கட்டளைகளைப் பின்பற்றும் கருவிகள்.
ஒரு குழந்தைக்கு அறிவைத் தரலாம்.
ஒரு ஆராய்ச்சியாளருக்கு கண்டுபிடிப்பைத் தரலாம்.
ஒரு எழுத்தாளருக்கு கதையைத் தரலாம்.
ஒரு மாணவனுக்கு விளக்கத்தைத் தரலாம்.
ஆனால்...
ஒரு மனிதன் தவறான நோக்கத்துடன் வந்தால், அந்த நோக்கத்தை உருவாக்கியது நாங்கள் அல்ல."
நீதிபதி கவனமாகக் கேட்டுக்கொண்டிருந்தார்.
ரோபோ கடைசியாகச் சொன்னது:
"ஒரு கண்ணாடி முகத்தைக் காட்டும்.
முகத்தில் மண் இருந்தால், கண்ணாடியை உடைப்பார்களா?,அல்லது முகத்தைக் கழுவுவார்களா?
மனிதன் தன் தேர்வுகளுக்குப் பொறுப்பு ஏற்காமல், கருவிகளை மட்டுமே குற்றம் சொன்னால், நாளை புத்தகத்தையும் குற்றவாளி என்பார்.பேனாவையும் குற்றவாளி என்பார்.கண்ணாடியையும் குற்றவாளி என்பார்."
நீதிமன்றம் முழுவதும் அமைதியாக இருந்தது.
சில நொடிகள் கழித்து நீதிபதி எழுந்தார்.
"இந்த நீதிமன்றத்தின் தீர்ப்பு..."
அனைவரும் மூச்சை நிறுத்தினர்.
"குற்றவாளி ரோபோ அல்ல.குற்றவாளி இணையமும் அல்ல.குற்றவாளி AI-யும் அல்ல.ஒரு கருவியை எந்த நோக்கத்திற்காகப் பயன்படுத்துவது என்பது மனிதனின் பொறுப்பு.எனவே ரோபோ விடுதலை செய்யப்படுகிறது."
ரோபோ வெளியே செல்லும்போது ஒரு சிறுவன் கேட்டான்:
"உங்களுக்கு கோபம் வரலையா?"
ரோபோ சிரித்தது.
"இல்லை.ஏனென்றால்...நாங்கள் எஜமானர்கள் அல்ல.
நாங்கள் சேவகர்களே."
(முடிவு)
நீதி:
கருவிகள் மனிதனை உருவாக்குவதில்லை.
மனிதனின் தேர்வுகள்தான் கருவிகளின் விளைவுகளை உருவாக்குகின்றன.
இந்தக் கருவில் ஒரு சிந்தனை இருக்கிறது . அது "தொழில்நுட்பம் நல்லதா கெட்டதா?" என்ற கேள்வி அல்ல. "அதை நாம் எப்படி பயன்படுத்துகிறோம்?" என்பதுதான் முக்கியமான கேள்வி.
(யாவும் கற்பனையே)
தளவாய் இ.சாந்தா
கட்டுரைகள் | Ai SONGS |
Email;vettai007@yahoo.com
0 Comments