இன்னா நாற்பது -21

வேட்டை Sunday, November 15, 2026

இன்னா நாற்பது –39.

கொடுக்கும் பொருளில்லான் வள்ளன்மை யின்னா

கடித்தமைந்த பாக்கினுட் கற்படுத லின்னா

கொடுத்து விடாமை கவிக்கின்னா வின்னா

மடுத்துழிப் பாடா விடல்.

விளக்கம்:

பிறருக்கு கொடுக்க, பணம் இல்லாமல் இருப்பது வள்ளலுக்கு துன்பமாகும்.
பாக்கைக் கடிக்கும் போது இடையில் சிறு கல் வந்துவிடுவது துன்பமாகும்.
கவிஞருக்கு பரிசு கொடுக்க பொருள் இல்லாமல் போவது துன்பமாகும்.
சிறு தடங்கலினால் பாடிக் கொண்டிருக்கும் பாடலை இடையில் நிறுத்தி விடுவது துன்பமாகும்.

இன்னா நாற்பது –40.

அடக்க முடையவன் மீளிமை யின்னா

துடக்க மிலாதவன் றற்செருக் கின்னா

அடைக்கலம் வவ்வுத லின்னாவாங் கின்னா

அடக்க வடங்காதார் சொல்.

விளக்கம்:

கட்டுப்பாட்டோடு வாழ்பவன் கர்வம் கொள்வது துன்பமாகும்.
முயற்சி எதுவும் செய்யாதவன் காட்டும் தற்பெருமை துன்பமாகும்.
பாதுகாப்பாக வைத்திருக்கும்படி கொடுக்கப் பட்ட பொருளை ஒருவன் தனதாக்கிக் கொள்வது துன்பமாகும்.
புரிந்து கொள்ள இயலாதவர்களுக்கு வழங்கப்படும் ஆலோசனைகள் துன்பமாகும்.

(முற்றும்)