ஜனநாயகக் கட்சிக்கு வெள்ளை மாளிகை அச்சுறுத்தல்!

ஜனநாயகக் கட்சியினர் டிரம்ப் மீதான விசாரணைகளைத் தொடர்ந்தால், குற்றவியல் குற்றச்சாட்டுகள் சுமத்தப்படும் என வெள்ளை மாளிகை அச்சுறுத்தல் விடுத்துள்ளது.

அதிபர் டொனால்ட் டிரம்பின் நிர்வாகம் மீதான திட்டமிடப்பட்ட விசாரணைகள் சட்ட வரம்புகளை மீறக்கூடும் என்றும், இதனால் அக்கட்சி காங்கிரஸின் கட்டுப்பாட்டை ஏற்கும் முன்னதாக பதற்றம் அதிகரிக்கும் என்றும் வெள்ளை மாளிகை ஜனநாயகக் கட்சியினரை எச்சரித்துள்ளது.

அசோசியேட்டட் பிரஸ்ஸின் தகவல்படி, ஜனவரியில் அவை மேற்பார்வைக் குழுவிற்குத் தலைமை தாங்குவார் என எதிர்பார்க்கப்படும் பிரதிநிதி ராபர்ட் கார்சியாவிற்கு, வெள்ளை மாளிகை ஆலோசகர் வில் ஷார்ஃப் எழுதிய கடிதத்தில் இந்த எச்சரிக்கையை விடுத்துள்ளார்.

அரசு அதிகாரிகளை அச்சுறுத்தும் நோக்கம் கொண்ட மிரட்டல்கள் அல்லது விசாரணைகள் “அப்பட்டமான குற்றச்செயலாக” அமையக்கூடும் என்று ஷார்ஃப் வாதிட்டார்.

“டொனால்ட் டிரம்ப் எதையோ மறைக்கிறார் என்று தெரிகிறது” என்று கூறி, கார்சியா அந்த எச்சரிக்கையை நிராகரித்தார்.

நாடாளுமன்ற விசாரணைகளுக்கு “வெள்ளை மாளிகையின் அனுமதி” தேவையில்லை என்று அவர் வலியுறுத்தினார்.

"விசாரணைகளையும் மேற்பார்வையையும் நடத்துவதற்கு காங்கிரஸுக்கு பரந்த சுதந்திரம் உள்ளது; இது சட்டம் இயற்றும் அதிகாரத்தில் இயல்பாகவே உள்ள ஒரு அதிகாரமாகும்," என்று கார்சியா கூறினார்.

டிரம்பின் குடும்ப நிதி விவகாரங்கள், கிரிப்டோகரன்சி பரிவர்த்தனைகள், குடியேற்ற அமலாக்கம் மற்றும் ஜெஃப்ரி எப்ஸ்டீன் வழக்கை நிர்வாகம் கையாண்ட விதம் ஆகியவை குறித்து ஜனநாயகக் கட்சியினர் விசாரணைகளைத் தயாரிக்கின்றனர்.

டிரம்பின் வெள்ளை மாளிகை கட்டுமானத் திட்டங்கள் மற்றும் அதில் உள்ள சாத்தியமான நல முரண்பாடுகளையும் அவர்கள் ஆய்வு செய்யத் திட்டமிட்டுள்ளனர்.

டிரம்ப்பும் அவரது நிர்வாகமும் தவறுகள் எதையும் செய்யவில்லை என மறுத்துள்ளனர்.

காங்கிரஸின் மேற்பார்வை அதிகாரங்களை ஏற்றுக்கொண்ட தலைமை வழக்கறிஞர் டாட் பிளான்ச், நீதித்துறை சட்டமியற்றுபவர்களுடன் தொடர்ந்து ஒத்துழைக்கும் என்று கூறினார்.

"காங்கிரஸுக்கு மேற்பார்வை அதிகாரம் உள்ளது. அது எப்போதுமே இருந்துள்ளது, இனியும் இருக்கும்," என்று பிளான்ச் கூறினார்