வெற்று வார்த்தை !

பாலும் தேனும் நதியாய் ஓடும்

கனவில் மிதந்து

மூழ்கிப் போனார்கள்

எங்கள் மூதாதையர்கள்

" தேர்தல்களினால் அல்ல

வியர்வைத் துளிகளில்தான்

உயரும் வாழ்வு" என

வலியோடு உணர்ந்தார்கள்

எங்கள் பெற்றோர்கள்

" போராட்டமே வாழ்க்கை "என்பதை

ஊர்வலம், வரிசை, காத்திருப்பு

எனும் பட்டறிவால் 

புரிந்து கொண்டோம்

பரிதாபத்திற்குரிய நாங்கள்

"இடைத்தரகர்களோடு தொடர்புடைய

தரமான போட்டிகளிடையே தான்

நமது எதிர்காலம்"

எனும் படிப்பினையின் பயத்தோடு

எங்களின் வாரிசுகள்

எங்கள் வழி காட்டிகளே!

" உண்டி உடை உறைவிடம் "என்பது

"மேலோகம் செல்வதற்கான மந்திரமோ?" 

எனும்

புதிரோடு உலவுகிறார்கள்

உலகம் புரியாதவர்கள்

" அடிப்படைத் தேவைகள் எவை? "

எனும் கேள்விக்கான பதிலையாவது 

அவர்களின் செவிகளில் 

சொல்லி வையுங்கள்

உங்கள் வாழ்நாள் சாதனையாக...

அதுவரை

உங்கள் விரல்கள் சுட்டும்

" சுதந்திரம் " என்பது

வெற்று வார்த்தையே...

Vettai Email-vettai007@yahoo.com