ஏற்றுமின்பக்குமிழி

இல்லை இல்லை என்கிறார் 

இவ்விகத்தினில்

இல்லார்க்குமிருப்பவர்க்கும்

இறைப்பவன் இறைவெனென் றறியாமல்

இருக்கும் இடம் யாவிலும் 

இருப்பவன் ஒருவனே

இல்லை என்ற புள்ளியில் 

உருவானவிறை அவன்தானே

உன் பெயர் உனக்குத்தான் 

என் பெயர் எனக்கேதான்

எல்லாமுமாக இருப்பவன் 

அவனுக்கெதற்கு ஓர் பெயர்

கண்ணை உனக்குத் தந்தவன்

காதைக் கூர்மை ஆக்கினன்

எந்தை இந்த உலகினில்

ஏதுனக்குத் தரவில்லையே

உள்ளம் எல்லாம் அறிபவன்

உறங்கி அதிலே வாழ்பவன் 

கள்ளம் இல்லாப் பதியவன்

காணும் இன்பம் வேண்டுமே

சொல்லை உனக்குத் தந்தனன் 

சோதியாயுனக்கு வாய்ந்தனன்

சிந்தை அதிலே சேர்ந்தனன்

சிறப்பாய் வேதம் புனைந்தனன்

எல்லை இல்லாக் கோடு நீ

ஏற்றுமின்பக் குமிழி நீ

அகல வானில் துருவம் நீ

ஆதியை விஞ்சிய அருவம் நீ

அன்பிலார்க்கும் அன்பாய் நீ

ஆலயத்தின் கூட்டம் நீ

பண்பிலாரும் பாதம் தொடப்

பரம்பொருளாய் ஆனாய் நீ

ஆதியும் அந்தமும் நீ

நீதியின் எந்தையும் நீ

ஆதி அந்தம் இல்லாத

சோதியாகும் விந்தை நீ

நீதியின் நாயன் நீ

நேசமிகு தூயன் நீ

ஏதுமிலா ஏந்துபவர்க்கு

எண்ணிலாதீயும் ஈசன் நீ

எட்டுத்திக்கும் இசையாய் நீ

பட்டுத் தெறிக்கும் ஒளியும் நீ

கற்றறிந்த குருவும் நீ

காற்றில் அசையும் சருகும் நீ

ஏற்றி வைத்த தீபமாய்

ஏற்றம் தந்த ஏகனே

மாற்றமில்லாக் கருணையை

மானிடர்க்குவந்திடும் மாயனே

அல்லல் படும் அவனியில்

இல்லாதிருக்கும் இறையோனே

இல்லம் எல்லாம் இயைந்து வாழ

இல்லை சொல்லா நாயனே

நாட்டம் எல்லாம் நாடிடும்

காட்டும் திசையில் வணங்கிட

தேடி வந்தேன் தேவனே

தேட்டம் நீயே நாயனே

நீண்டிருக்கும் கடலும் நீ

நேரமதிலே வியூகம் நீ

போர்த்தும் கரிய இரவும் நீ

புலரல் வேளை மலரும் நீ

Also Read...கவிதை