நோயெதிர்ப்பு சக்தியை அதிகரிக்கணுமா? அப்ப டாக்டர் சொல்ற இந்த 5 உணவுகளை அடிக்கடி சாப்பிடுங்க..

Monsoon Health Tips In Tamil: தற்போது மழைக்காலம் என்பதால் நிறைய பேர் சளி, இருமல், காய்ச்சல் போன்ற பிரச்சனையால் அதிகம் அவதிப்படுவார்கள். ஏனெனில் மற்ற காலங்களை விட மழைக்காலத்தில் நோயெதிர்ப்பு சக்தி சற்று குறைவாக இருக்கும். அதுவும் குழந்தைகள் மற்றும் முதியவர்களுக்கு இயற்கையாகவே நோயெதிர்ப்பு சக்தி சற்று குறைவாக இருப்பதால், இத்தகையவர்கள் அதிகம் மழைக்காலத்தில் உடல்நலக்குறைவால் சிரமப்படுவார்கள்.

ஆனால் மழைக்காலத்தில் பலவீனமாக இருக்கும் நோயெதிர்ப்பு சக்தியை அதிகரிக்க நினைத்தால், உணவில் சற்று கூடுதல் கவனம் செலுத்தினாலே போதும். அதுவும் நம் பாரம்பரிய உணவுகளைத் தேர்ந்தெடுத்து மழைக்காலத்தில் அதிகம் உட்கொண்டு வந்தால் நோயெதிர்ப்பு மண்டலத்தை வலுப்படுத்தி, நோய்வாய்ப்படுவதைத் தடுக்கலாம். டாக்டர் கார்த்திகேயன் தனது சமூக வலைத்தள பக்கத்தில் நோயெதிர்ப்பு சக்தியை அதிகரிக்கும் 5 தமிழ் உணவுகள் குறித்து பகிர்ந்துள்ளார். அந்த உணவுகள் என்னவென்பதைக் காண்போம்.

1. தூதுவளை

நோயெதிர்ப்பு சக்தியை அதிகரிக்க உதவும் முதன்மையான பொருள் தான் தூதுவளை. இந்த தூதுவளை இலை முட்கள் நிறைந்திருக்கும். இந்த தூதுவளையைக் கொண்டு ரசம் செய்து மழைக்காலத்தில் சாப்பிடுவது நல்லது. ஏனெனில் தூதுவளையில் உள்ள அல்கலாய்டுகள் நுரையீரலுக்கு நன்மை அளிக்கிறது. 2023-ல் வெளிவந்த ஆய்வில், நமது நுரையீரலின் எதிர்ப்பு சக்தியை அதிகரிக்கும் நிறைய பொருட்கள் தூதுவளையில் இருப்பதாக கண்டுபிடிக்கப்பட்டுள்ளது. இதனால் நுரையீரலின் எதிர்ப்பு சக்தி 60% அதிகரிக்கிறது என்று டாக்டர் கார்த்திகேயன் கூறினார்.

அதுவும் தூதுவளை இலையை கொதிக்கும் நீரில் போட்டு, அத்துடன் மஞ்சள் தூள், மிளகுத் தூள் சேர்த்து சூப் செய்து குடித்தாலோ அல்லது தூதுவளையை ரசமாக செய்து சாப்பிட்டாலோ, சளி, இருமல், மூக்கு ஒழுகல், நெஞ்சு சளி போன்றவற்றில் இருந்து நல்ல நிவாரணத்தை அளிப்பதோடு, நோயெதிர்ப்பு சக்தியை அதிகரிக்கும் என்று டாக்டர் கூறினார்.

2. சுக்கு மல்லி காபி

நோயெதிர்ப்பு சக்தியை அதிகரிக்கும் மற்றொரு உணவுப் பொருள் தான் சுக்கு மல்லி காபி. இந்த காபியில் காபித் தூள் எதுவும் இருக்காது. காய்ந்த இஞ்சியான சுக்கு மற்றும் காய்ந்த மல்லியைக் கொண்டு தயாரிக்கப்படுவதாகும். 2024-ல் வெளிவந்த ஆய்வறிக்கையில், சுக்கு மல்லி காபி நோயெதிர்ப்பு சக்தியை அதிகரிக்கக்கூடியது என்பது தெரியவந்துள்ளது. அதுவும் இந்த காபியில் சுக்கு, மல்லியுடன் மிளகு, ஏலக்காய், கிராம்பு, சீரகம் போன்றவற்றை வறுத்து, பொடி செய்து, கொதிக்கும் நீரில் போட்டு கொதிவிட்டு வடிகட்டி குடிப்பதனால், இது உடலுக்கு இருமடங்கு நன்மைகளை வழங்குகிறது என்று டாக்டர் கூறினார். எனவே பலவீனமான நோயெதிர்ப்பு சக்தியை கொண்டிருந்தால், வழக்கமான காபிக்கு பதிலாக சுக்குமல்லி காபியை அடிக்கடி குடியுங்கள்.

3. மஞ்சள் மிளகு

பால் நோயெதிர்ப்பு சக்தியை அதிகரிக்கும் மற்றொரு அற்புதமான பானம் தான் மஞ்சள் மிளகு பால். மிளகில் பெப்பரினும், மஞ்சளில் பல சக்திவாய்ந்த ஆன்டி-ஆக்ஸிடன்ட்டுகளும் உள்ளன. இந்த மஞ்சள் மிளகு பாலை தினமும் குடித்து வந்தால், நோயெதிர்ப்பு சக்தி வலிமையாக இருக்கும் என்று டாக்டர் கூறினார்.

4. நிலவேம்பு கசாயம்

2015-ல் டெங்கு காய்ச்சல் மிகவும் தீவிரமாக இருந்தது. அப்போது இதிலிருந்து பாதுகாப்பளிக்க தமிழ்நாடு அரசு நிலவேம்பு கசாயத்தை மக்களுக்கு கொடுத்து வந்தது. அந்த அளவில் நிலவேம்பு கசாயம் நோயெதிர்ப்பு சக்தியை அதிகரிக்கும் ஆற்றல் கொண்டது. குறிப்பாக கசப்புகளின் அரசன் என்று அழைக்கப்படும் நிலவேம்பு, வைரஸ் செல்களுக்குள் ஊடுருவதைத் தடுக்கும் ஆற்றல் உள்ளது என்று ஆய்வுகளில் கண்டுபிடிக்கப்பட்டுள்ளன. அதுவும் இந்த நிலவேம்பு கசாயத்தை குடித்து வந்தால், நுரையீரலில் வைரஸ்கள் சேர்வதை 60% குறைக்கும் என்றும் ஆய்வுகளுக்கு கண்டுபிடிக்கப்பட்டுள்ளன. இப்படிப்பட்ட நிலவேம்பு கசாயத்தை 15 நாட்களுக்கு ஒருமுறை குடித்து வரவேண்டும் என்றும் டாக்டர் கூறினார்.

5. நீராகாரம்

பலரும் நீராகாரம் சளி பிடிக்கும் என்று, மழைக்காலத்தில் இவற்றை உட்கொள்வதைத் தவிர்ப்பார்கள். ஆனால் நீராகாரத்தில் உள்ள அத்தியாவசிய புரோபயோடிக்குகள் குடல்களை பாதுகாக்கும். அதுவும் நல்ல காரமான உணவுகளை உட்கொண்ட மறுநாள் காலையில் நீராகாரத்தை உட்கொண்டால், குடல் ஆரோக்கியமாக இருக்கும். அதுவும் இந்த பழைய சாதத்துடன் வெங்காயத்தை சேர்த்து உட்கொள்ளும் போது, வெங்காயத்தில் உள்ள சல்பர் பழைய சாதத்தில் உள்ள புரோபயோடிக்குடன் சேர்ந்து, உடலின் நோயெதிர்ப்பு சக்தியை அதிகரிக்கும். அதோடு வைட்டமின் பி12 அதிகம் நிறைந்த ஒரே சைவ உணவு என்றால், அது நீராகாரம் தான் என்று டாக்டர் கார்த்திகேயன் கூறினார்.

boldsky