அமெரிக்கா ஒப்பந்தத்தால் மீண்டும் வணிகத்தைத் தொடங்கிய ஈரான்! கச்சா எண்ணெய் விலை குறைய வாய்ப்பு

மூன்று பிரம்மாண்ட ஈரான் நாட்டு எண்ணெய் டாங்கர் கப்பல்கள் வட இந்தியப் பெருங்கடல் பகுதியில் வெற்றிகரமாகப் பயணித்து வருவதாகக் குறிப்பிட்டுள்ளார்.

அமெரிக்காவுடனான அமைதி உடன்படிக்கையைத் தொடர்ந்து, ஈரான் நாட்டின் கச்சா எண்ணெய் டாங்கர் கப்பல்கள் மீண்டும் தங்களது கடல்வழிப் போக்குவரத்தைத் தொடங்கியுள்ளது.

கடந்த ஏப்ரல் 13 முதல் ஈரான் நாட்டின் மீது அமெரிக்கா விதித்திருந்த கடுமையான கடல்வழி முற்றுகை மற்றும் பொருளாதாரத் தடைகள் காரணமாக, அந்நாட்டின் கப்பல் போக்குவரத்து முற்றிலும் முடக்கப்பட்டிருந்தது. இதனால் உலக அளவில் கச்சா எண்ணெய் விநியோகத்தில் பெரும் தட்டுப்பாடு நிலவி வந்தது.

இந்நிலையில், அமெரிக்கா மற்றும் ஈரான் நாடுகளுக்கு இடையே ஏற்பட்ட வரலாற்றுச் சிறப்புமிக்க அமைதி ஒப்பந்தத்தின் ஒரு பகுதியாக, ஈரான் மீதான கடல்வழி முற்றுகையை அமெரிக்கா தளர்த்தியுள்ளது. இதனைத் தொடர்ந்து, ஈரானின் அரசுத் தொலைக்காட்சி வெளியிட்டுள்ள அதிகாரப்பூர்வ அறிக்கையில், தங்களது கச்சா எண்ணெய் டாங்கர்கள் மற்றும் பிற வணிகக் கப்பல்கள் உலகளாவிய கடல்வழிப் போக்குவரத்தை மீண்டும் முழு வீச்சில் தொடங்கியுள்ளதாகத் தெரிவித்துள்ளது.

உலக வர்த்தகத்தின் மிக முக்கியப் பகுதியாகக் கருதப்படும் 'ஹார்முஸ் ஜலசந்தி' பகுதியில் இருந்து கள நிலவரங்களை விவரித்த ஈரான் நாட்டின் செய்தியாளர், தற்போது மூன்று பிரம்மாண்ட ஈரான் நாட்டு எண்ணெய் டாங்கர் கப்பல்கள் வட இந்தியப் பெருங்கடல் பகுதியில் வெற்றிகரமாகப் பயணித்து வருவதாகக் குறிப்பிட்டுள்ளார்.

கச்சா எண்ணெய் மட்டுமன்றி, ஈரானுக்குத் தேவையான அத்தியாவசியப் பொருட்கள் மற்றும் கால்நடைத் தீவனங்களை ஏற்றிச் சென்ற மேலும் இரண்டு பெரிய சரக்குக் கப்பல்களும் ஈரானின் தெற்குத் துறைமுகங்களை நோக்கித் தடையின்றிப் பயணித்து வருகின்றன. அமெரிக்காவின் கடல்வழி முற்றுகையை முழுமையாக நீக்கும் கூட்டு ஆபரேஷன் தற்போதைய ஒப்பந்தத்தின்படி வெற்றிகரமாகச் செயல்படுத்தப்பட்டுள்ளதாக ஈரான் ஊடகங்கள் அறிவித்துள்ளன.

இந்த இரண்டு நாடுகளுக்கு இடையேயான பதற்றம் தணிந்து, எண்ணெய் கப்பல்களின் போக்குவரத்து மீண்டும் தொடங்கியிருப்பது உலக நாடுகளிடையே பெரும் நிம்மதியை ஏற்படுத்தியுள்ளது.

குறிப்பாக, கடந்த சில மாதங்களாக நிலவி வந்த உலகளாவிய எரிபொருள் தட்டுப்பாடு மற்றும் கச்சா எண்ணெய் விலை உயர்வு போன்ற பிரச்சனைகளுக்கு இந்த ஒப்பந்தம் ஒரு நிரந்தரத் தீர்வாக அமையும் என்று சர்வதேசப் பொருளாதார வல்லுநர்கள் கணித்துள்ளனர்.

ஈரான் தனது சர்வதேச வர்த்தகப் பாதையைத் திரும்பப் பெற்றுள்ளதால், வரும் நாட்களில் உலக சந்தையில் கச்சா எண்ணெய்யின் விலை கணிசமாகக் குறைய வாய்ப்புள்ளது என்றும் இந்தச் செய்தி விளக்குகிறது.

news18