இன்னா நாற்பது - 19

வேட்டை Sunday, November 01, 2026

இன்னா நாற்பது -35.

எழிலி யுறைநீங்கி னீண்டையார்க் கின்னா

குழலி னினிய மரத் தோசைநன் கின்னா

குழவிக ளுற்ற பிணியின்னா வின்னா

அழகுடையான் பேதை யெனல்.

விளக்கம்:

மேகம் மழையைப் பெய்யவில்லை என்றால், மக்களுக்கு துன்பமாகும்.
புல்லாங்குழலாகி, இன்னிசை தரவேண்டிய மூங்கில், ஒன்றோடொன்று உரசி எழுப்பும் ஓசை துன்பமாகும்.
குழந்தைகளுக்கு வரும் நோய் துன்பமாகும்.
அழகுள்ளவர்கள், அறிவிலிகளாக இருப்பது துன்பமாகும்.

இன்னா நாற்பது -36.

பொருளிலான் வேளாண்மை காமுறுத லின்னா

நெடுமாட நீணகர்க் கைத்தின்மை ன்னா

வருமனை பார்த்திருந் தூணின்னா வின்னா

கெடுமிடங் கைவிடுவார் நட்பு.

விளக்கம்:

ஏழைகள் மற்றவர்களுக்கு உதவி புரிய நினைப்பது துன்பமாகும்.
மாளிகைகள் இருந்தும், அவற்றில் வாழாமல் இருப்பது துன்பமாகும்.
உணவளிப்பவருக்காககா பசியோடு காத்திருப்பது துன்பமாகும்.
நமக்கு வரும் சோதனைக் காலத்தில், நண்பர்கள் நம்மை விட்டுப் போய் விடுவது துன்பமாகும்.

(தொடரும்)