"மோகத்தின் விலை "- 16

அதிகாலையிலேயே “ப்ரைஸ் டு லார்ட்”  எனும் அவனின் முதல் வார்த்தையுடன் தொடங்கும் பொழுதுகள், “அன்பே சிவம்” என்று கணவன்  சிவா வீட்டுக்கு வருமுன் அவள் அனுப்பும் வார்த்தையுடன் முடிவுறும். இன்று எதுவுமின்றி, எவருமின்றி தன்னந்தனியாக நிற்கும் போது மூச்சு முட்டியது. 

வெற்றியை நம்பி, தான் எடுத்து வந்த பணத்துடன், கொண்டு வந்த அத்தனை நகைகளையும், பெட்டியுடன் பறிகொடுத்து விட்டு, செல்லும் இடம் அறியாது தடுமாறி, மரத்தடியில் ஒண்டிக் கிடந்தாள் தேவகி.

எப்போதும் கணவன் வீட்டை விட்டு வேலைக்கு செல்ல விடியாதா என்று காத்திருக்கும் அவள், வெற்றி தன்னைத் தேடி வருவானா என்ற எண்ணத்துடன் இப்போதும் விடியம் வரை காத்திருந்தாள்.

இதோ,  காலைக் கதிர்கள் வானத்தில் வண்ணம் வரைய, பறவைகளின் ஆர்ப்பரிப்புடனும், அவரவர் தேடல்களுக்குமென பொழுது புலரத் தொடங்கியது. 

‘ஐய.. என்னைப் போல்தானா நீயும்?” என்பதைப் போல்,  தெருவோர சொறி நாய் ஒன்று அவளைப் பார்த்து இலேசாக குரைத்து  விட்டு நடையைக் கட்டியது.

பசி வயிற்றைக் கிள்ள, எதுவும் தோன்றாமல் நின்றிருந்த தேவகி, கடைக்  காரர் வந்ததும் மெதுவாக அவரை நெருங்கினாள்.  இரவு வந்து இட்டிலி வாங்கியவன் விபரம் கேட்க, அந்த மனிதர் சிரித்தார். 

“என்னம்மா நீ?  கடை என்றால் ஆயிரம் பேர் வருவார்கள்.  நான் யாரை ஞாபகம் வைக்க?” என்றவர்,  “அதுவும் நான் நேற்று உன்னைப் பார்க்கவே இலையே அம்மா” என்றார். திட்டமிட்டே வந்தவன் தன்னை ஏமாற்றி இருக்கின்றான் என்பதை புரிந்து கொண்டும், அதை ஏற்க மறுத்தது மனம்.

“நல்ல குடும்பத்து பெண் போல் தெரிகின்றது.  ஏனம்மா அறியாதவர் கூட வந்தாய்?” என்றவர் தானாகவே உணவுப் பொட்டலத்தை கையில் திணித்து விட்டு, “பார்த்துப் போம்மா. இந்தப் பகுதி அவ்வளவு நல்லதல்ல.  கவனம்” என்று விட்டு, “இந்தா இதை வைத்துக் கொள்”, என்று இரண்டு நூறு ரூபாய்களை நீட்டி, “என்னால் முடிந்தது இவ்வளவு தான்.  முடிந்தவரை சீக்கிரம் வீடு சென்று சேரப் பார்..” என்றார்.

எப்படிப் பட்ட சூல்நிலையில் இருக்கின்றோம் என்று உணர்ந்து, சுமக்க முடியாத முடியாத துன்பத்துடன்,  ஆயிரம், இலட்சம் என வெற்றிக்கு கணக்கே பார்க்காமல் அனுப்பியவள், தன் கையறு நிலையால், கை நீட்டி அந்த ரூபாய்களை பெற்றுக் கொண்டாள்.  அவரிடமே சொல்லி தன் கைபேசியை கொஞ்ச நேரம் சார்ஜ்ஜில் இட்டு, கைபேசியை அவரிடம் இருந்து பெற்றுக் கொண்ட உடனே வெற்றியை ,தேடினாள்.

மெசஞ்சரில் அவனைத் தொடர்பு கொள்ள இயலாத நிலையில் முகநூலில் தேட, அந்த கணக்கு டியாக்டிவேட் ஆக இருந்தது.  ஆக மொத்தத்தில் வெற்றி என்ற ஒருவன் அவள் வாழ்க்கயை திசை திருப்பி விட்டு மொத்தமாக காணாமல் போயிருந்தான். 

(தொடரும்)