மழைத் தூரல்

#நீர்த்தேக்கத்தில் கொக்கு

ஒரு கால் தூக்கி

வானில் வட்டமிடுகிறது.

#கடல் அடைந்த பின்னும்

துள்ளும் மீன் வாலில்

நதியின் ஓட்டம்.

#தோளில் சுமை 

கைத்தட்டல் வாங்குகிறார்

பொம்மையிடம் ஜவ்மிட்டாய்காரன்.

#இதயத்தில் துளைக்கு

அறுவை சிகிச்சை வேண்டாம்

அவள் வந்துசெல்லும் பாதை.

#தர்கா

எல்லா வித மக்களுக்கும்

அதே மயிலிறகு வருடல் தான்.

#குத்திகுத்தி துலாவிய

குச்சியை பிடித்து வெளியேறும்

உண்டியல் நோட்டில் காந்தி.

#தட்டில் விழவிழ

குரைக்கிறது யாசகனின் நாய்க்குட்டி

மழை ஒழுகும் நிழற்குடை.

#அகல் விற்கும் பெண்

அருகில் செல்ல விடவில்லை

தேங்கியநீரில் நிலா.

#மழைத் தூரல்

ஜன்னலில் மகள் கையில் 

பிடித்து விளையாடுகிறாள்

தட்டாம்பூச்சி.

#ஜன்னல் இருக்கை

கையசைக்கிறது ரோட்டோரம் 

விற்கும் பொம்மைகளுள் ஒன்று.

#தலைநிமிர்ந்து பார்க்கிறேன்

கோபுர உச்சியை காட்டுகிறது

பட்டாம்பூச்சி.

#விளையாடும் சிறார்களின்

வியர்வையில் குளிக்கிறது

ஆற்றுமணல்.

#மலைஉச்சியில் நிற்கிறேன்

ஊர் எல்லையை வட்டமிட்டு

காட்டுகிறது புகைவண்டி.

#துடைக்க துடைக்க

மூக்குக்கண்ணாடியை புதிதாக்குகிறது

மழைத் தூரல்.

#கோவில் பிரகாரம்

சுற்றிவரும் அவள் கால்களில்

அப்பாடா மெட்டி இல்லை

Vettai Email-vettai007@yahoo.com