அச்சுறுத்தும் குரங்கு காய்ச்சல்... கர்நாடகாவில் பலி எண்ணிக்கை 2ஆக உயர்வு..!

வேட்டை Monday, February 12, 2024

கர்நாடகாவில் குரங்கு காய்ச்சலால் பாதிக்கப்பட்ட இருவர் உயிரிழந்த சம்பவம் அதிர்ச்சியை ஏற்படுத்தியுள்ளது.

குரங்கு காய்ச்சல் என்று அழைக்கப்படும் கியாசனூர் ஃபாரஸ்ட் டிசீஸ் கர்நாடகா, மஹாராஷ்டிரா உள்ளிட்ட மாநிலங்களில் பரவலாக காணப்படுகிறது. விலங்குகளின் உடல்களில் ஒட்டி வாழும் ஒட்டுண்ணிகள் கடிப்பதால் ஏற்படும், இந்த நோயால் பாதிக்கப்பட்டவர்களுக்கு காய்ச்சல், தலைவலி, உடல்வலி, வாந்தி, உள்ளிட்ட பாதிப்புகள் ஏற்படும். நோய் தீவிரமடைந்தால் மூக்கில் ரத்தம் வடிதல், பற்களின் வேர்களில் ரத்தம் வடிதல் ஆகியவை ஏற்படுகின்றன. நரம்பியல் கோளாறுகள், மன குழப்பங்கள் ஏற்படும் எனவும் தெரிவிக்கப்பட்டுள்ளது.

இந்த சூழலில் கர்நாடக மாநிலத்தில் குரங்கு காய்ச்சலால் பாதிக்கப்பட்டோரின் எண்ணிக்கை நாளுக்கு நாள் அதிகரித்து வருகிறது. இதுதொடர்பாக அம்மாநில சுகாதாரத் துறை வெளியிட்டுள்ள அறிக்கையின்படி, ஜனவரி ஒன்றாம் தேதி முதல் 2,288 மாதிரிகள் சேகரிக்கப்பட்டு ஆய்வுக்கு உட்படுத்தப்பட்டுள்ளது. இதில் 53 குரங்கு காய்ச்சல் பாதிப்புக்கு ஆளாகியிருப்பது உறுதி செய்யப்பட்டுள்ளது. ஜனவரி 8ஆம் தேதி சிவமொக்கா மாவட்டம் ஹோசாநகர் தாலுகாவில் 18 வயது சிறுமியும், சிக்கமங்களூருவின் சிருங்கேரி தாலுகாவில் வசிக்கும் 79 வயது முதியவரும் குரங்கு காய்ச்சல் பாதிப்பால் உயிரிழந்துள்ளனர்.

அதில், உத்தர கன்னடா மாவட்டத்தில் அதிகபட்சமாக 34 பேர் குரங்கு காய்ச்சலால் பாதிக்கப்பட்டுள்ளனர். இதேபோல், ஷிவமொக்காவில் 12 பேரும், சிக்கமங்களூரில் 3 பேரும் பதிக்கப்பட்டுள்ளனர். குரங்கு காய்ச்சல் பாதிப்புகள் மற்றும் இறப்பு எண்ணிக்கை அதிகரித்து வரும் நிலையில், கர்நாடக சுகாதாரம் மற்றும் குடும்ப நல ஆணையர் ரன்தீப் சுகாதார அதிகாரிகளுடன் ஆலோசனை மேற்கொண்டார். தொடர்ந்து முன்னெச்சரிக்கை நடவடிக்கைகளை தீவிரப்படுத்தவும் அவர் அறிவுறுத்தியுள்ளார்.

news18