1 கம்பெனி... வெறும் £30,133 முதலீடு... 250 ஆண்டுகள் இந்தியாவை ஆண்ட கார்ப்பரேட் பற்றி தெரியுமா?

1599-ஆம் ஆண்டில் கிழக்கிந்திய கம்பெனி தொடங்கப்பட்டபோது, இந்தியத் துணைக்கண்டத்தின் மக்கள் தொகை சுமார் 15 கோடியாக இருந்தது. அதாவது, அன்றைய உலக மக்கள் தொகையில் ஐந்தில் ஒரு பங்கு (20 சதவீதம்) இந்தியாவில் இருந்தனர். மேலும், உலகளாவிய உற்பத்தியில் இந்தியாவின் பங்களிப்பு 25 சதவீதமாக இருந்தது. ஆனால், இந்தியாவின் மக்கள் தொகையில் வெறும் 5 சதவீதத்தையும், உலகளாவிய உற்பத்தியில் 3 சதவீதத்திற்கும் குறைவான பங்கையுமே இங்கிலாந்து (ஐக்கிய ராஜ்ஜியம்) கொண்டிருந்தது.

பிரிட்டிஷ் பேரரசில் சூரியன் அஸ்தமிப்பதில்லை என்று நாம் பாடப்புத்தகங்களில் படித்திருப்போம். ஆனால், இன்றைய அமெரிக்காவைப் போல அன்றைய உலகின் சக்திவாய்ந்த பொருளாதார மையமாகத் திகழ்ந்த இந்தியத் துணைக்கண்டத்தை வீழ்த்தியது பிரிட்டிஷ் அரசாங்கம் அல்ல; 'பிரிட்டிஷ் கிழக்கிந்திய கம்பெனி' என்ற ஒரு தனியார் வணிக நிறுவனமே ஆகும்.

1599-ஆம் ஆண்டில் லண்டனில் உள்ள சில வியாபாரிகள் ஒன்றிணைந்து இந்த நிறுவனத்தைத் தொடங்கினர். அப்போது அதன் ஆரம்ப முதலீடு வெறும் £30,133 மட்டுமே. இந்த மிகச் சிறிய முதலீட்டைக் கொண்டு தொடங்கப்பட்ட ஒரு நிறுவனம்தான் பின்னாட்களில் ஒட்டுமொத்த இந்தியத் துணைக்கண்டத்தையுமே தன் கட்டுப்பாட்டுக்குள் கொண்டுவந்தது.

1757-ஆம் ஆண்டு பிரிட்டிஷ் கிழக்கிந்திய கம்பெனிக்கும், வங்காள நவாப் சிராஜ்-உத்-தௌலாவிற்கும் இடையே பிளாசிப் போர் நடைபெற்றது. இதில் வெற்றிபெற்று வங்காளத்தைக் கைப்பற்றிய பிறகு, அவர்களின் கருவூலத்திலிருந்து £2.5 மில்லியன் செல்வத்தை ராபர்ட் கிளைவ் கைப்பற்றினார். இன்றைய மதிப்பில் இது சுமார் £232 மில்லியன் கார்ப்பரேட் கொள்ளையாகும். இந்தக் கொள்ளையடிக்கப்பட்ட செல்வம், 100 படவுகளில் ஏற்றப்பட்டு கங்கை நதி வழியாக கம்பெனியின் தலைமையகமான கல்கத்தாவிற்குக் கொண்டு செல்லப்பட்டது.

வர்த்தகம் செய்ய வந்த ஒரு நிறுவனம், இந்தியர்களை அடக்கி ஆளத் தனக்கென ஒரு மாபெரும் ராணுவத்தையே கட்டமைத்தது. 1803-ஆம் ஆண்டளவில், கம்பெனியின் தனியார் ராணுவத்தில் சுமார் இரண்டு லட்சம் வீரர்கள் இருந்தனர். இது அன்றைய காலகட்டத்தில் பிரிட்டனின் அதிகாரப்பூர்வ தேசிய ராணுவத்தை விட இரண்டு மடங்கு பெரியதாகும். வர்த்தகம் செய்ய வந்த ஒரு கார்ப்பரேட் நிறுவனம் இத்தகைய பிரம்மாண்டமான ராணுவப் படையை உருவாக்கி, கோடிக்கணக்கான மக்களை வன்முறை மூலம் அடிமைப்படுத்தியது உலக வரலாற்றிலேயே ஈடு இணையற்ற நிகழ்வாகும்.

1770-ஆம் ஆண்டு வங்காளத்தில் ஏற்பட்ட கொடூரமான பஞ்சத்தில், சுமார் 12 லட்சம் மக்கள் பட்டினியால் மடிந்தனர். அதாவது, வங்காள மக்கள் தொகையில் ஐந்தில் ஒருவர் உயிரிழந்தனர். வீதிகளிலும், நதியோரங்களிலும் பிணங்கள் குவியலாகக் கிடந்தன. அந்த மரண ஓலங்களுக்கு மத்தியிலும், எந்தவித மனிதாபிமானமுமின்றி கிழக்கிந்திய கம்பெனி வரி வசூலைத் தீவிரப்படுத்தியது. மேலும், அதே ஆண்டில் லண்டனில் இருந்த தனது பங்குதாரர்களுக்கு வரலாறு காணாத வகையில் 12.5% லாப ஈவுத்தொகையையும் அறிவித்துக் கொண்டாடியது.

காலப்போக்கில் கிழக்கிந்திய கம்பெனி உலக வர்த்தகத்தின் ஏகபோக மையமாக உருவெடுத்தது. தேயிலை, பட்டு, மசாலாப் பொருட்கள், மற்றும் பருத்தித் துணிகள் என அனைத்திலும் ஆதிக்கம் செலுத்தியது. தன் உச்சக்கட்டத்தில், உலக வர்த்தகத்தில் ஏறக்குறைய பாதியையே தன் கட்டுப்பாட்டில் வைத்திருக்கும் அளவிற்கு அது ஒரு மாபெரும் பன்னாட்டு கார்ப்பரேட் நிறுவனமாக உருவெடுத்தது.

இந்தியா போன்ற காலனித்துவ நாடுகளில் இருந்து பெருமளவு செல்வத்தைச் சுருட்டிய போதிலும், கட்டுப்பாடற்ற பேராசை மற்றும் ஊழலால் 1772-ல் கம்பெனி திவாலாகும் நிலைக்குத் தள்ளப்பட்டது. கம்பெனியின் £1.5 மில்லியன் கடன் சுமையால், ஐரோப்பா முழுவதும் 30-க்கும் மேற்பட்ட வங்கிகள் திவாலாகின. நிலைமை கைமீறிப் போனதால், பிரிட்டிஷ் பொருளாதாரமே சரியும் அபாயம் உருவானது. இதனைத் தொடர்ந்து, வீழ்ச்சியடையும் நிலையில் இருந்த அந்த நிறுவனத்தைக் காப்பாற்ற பிரிட்டிஷ் அரசாங்கம் தலையிட்டு, முதன்முறையாக £1.4 மில்லியன் நிதியை (Bailout) வழங்கி அதனை மீட்டது.

ஆனால், இந்த நிதி உதவிக்குக் கைமாறாக, பிரிட்டிஷ் அரசாங்கம் கம்பெனியின் மீது 'ஒழுங்குமுறைச் சட்டம் 1773' (Regulating Act of 1773) மூலம் முதல்முறையாகத் தனது நாடாளுமன்றக் கட்டுப்பாடுகளை விதித்தது. சுமார் 85 ஆண்டுகளுக்குப் பிறகு, 1857-ஆம் ஆண்டு நடைபெற்ற பெரும் கிளர்ச்சிக்குப் (சிப்பாய்க் கலகம்) பிறகுதான், 1858-ல் கிழக்கிந்திய கம்பெனியின் ஆட்சி முழுமையாக ரத்து செய்யப்பட்டது. அதன்பிறகே, இந்தியா பிரிட்டிஷ் ராணியின் நேரடிக் கட்டுப்பாட்டின் கீழ் சென்றது.

news18