வள்ளுவரும் வாழும் குறளும் (பன்முக ஆய்வு)-20

அவர் தம் உரையில், "திருவள்ளுவரின் காலம் என்னவாக இருந்திருக்கும் என நான் ஆய்வு செய்தேன். பல பல ஆதாரங்களைச் சேகரித்துப் பார்த்ததில், திருவள்ளுவரின் காலம் கிறித்து பிறப்பதற்கு முன் 30 ஆண்டுகட்கு முன் திருவள்ளுவர் பிறந்தார் என தெரிய வருகிறது" என்றார்.

1921 ஆம் ஆண்டு, சென்னை பச்சையப்பன் கல்லூரியில் மறைமலை அடிகளின் தலைமையில் நடைபெற்ற கூட்டத்தில் 'திருவள்ளுவரின் பிறப்பு கி.மு. 31' என முடிவு செய்யப்பட்டது. இவ்வடிப்படையில் திருவள்ளுவர் ஆண்டு கணக்கிட அறிவிக்கப்பட்டது.

அடிகளாரின் ஆய்வின் முடிவில் சொன்ன "திருவள்ளுவர் ஆண்டை கிறித்து ஆண்டுடன் 31 ஆண்டுகளைக் கூட்டிக் கணக்கில் எடுத்துக் கொள்ள வேண்டும்" என்ற முடிவை அறிஞர்கள் ஏற்றுக் கொண்டனர்.

1969-இல் கலைஞர் திரு.மு.கருணாநிதி அவர்கள் தமிழக முதலமைச்சர் ஆன பிறகு, பொங்கலுக்கு அடுத்த நாளைத் 'திருவள்ளுவர் நாள்' என அறிவித்தும், அந்நாளில் அரசு விடுமுறை அளிப்பது என்றும், 01.01.1970 முதல் இது நடைமுறைக்கு வரும் எனவும் ஆணை பிறப்பித்தார். திருவள்ளுவர் ஆண்டு முறையைத் தமிழக அரசு ஏற்று. 1971-ஆம் ஆண்டு முதல் அரசு நாட்குறிப்பிலும், 1972 முதல் அரசிதழிலும், 1981 ஆம் ஆண்டு முதல் அனைத்து அலுவலகங்களிலும் நடைமுறைப் படுத்தி வருகிறது.

இங்ஙனம், ஆன்றோர்களும் சான்றோர்களும் கூடி முடிவெடுத்ததின் காரணமாக இவ்வாறு கணக்கிடப்பட்டு, இப்பொழுது வழக்கத்தில் இருந்து வருகின்றது. இதுவும் சரித்திர மரபு கருதி ஏற்றுக் கொள்ளப்பட்டு வழக்கில் இருக்கிறது. எனினும், இதுவும் ஆய்வுக்கு உரிய கால நிலைதான் என்பதில் சிறிதும் ஐயம் இல்லை!

(தொடரும்)