புரோகோனிஷ் குமாரி ரெங்க்மா-46

பிரமுகர்களாலும், பேராசிரியர்களாலும், மாணவர்களாலும் அரங்கு நிரம்பி வழிந்தது. பிரமுகர்களுக்காக ஒதுக்கப்பட்ட ஆசனங்களில் செரோக்கியும், ரெங்க்மாவும் அமர்த்தப்பட்டனர். விழா ஆரம்பிப்பதற்கான ஆயத்தங்கள் முடிந்ததும், மேளதாலத்தோடு கௌரவ அதிதி பல்கலைக்கழக உபவேந்தரால் அழைத்து வரப்பட்டார்!

தினமும் காலையில் ஒரு மாணவனும் மாலையில் ஒரு மாணவனும் தமது ஆய்வுகளைச் சமர்ப்பிக்க வேண்டும். இவ்வாறு தொடர்ந்து இரு வாரங்கள் நிகழ்வுகள் இடம்பெறும். அந்த வகையில் இன்று காலை தனது ஆய்வுக்கட்டுரையை சமர்ப்பிக்கப் போகின்றான் இர்வின்.

எற்கனவே கணினி மூலம் தயார்படுத்தப்பட்டு வைத்திருந்த அவனது ஆவணத்தொகுப்பு திரையில் ஓடத்தொடங்கியது!

முதலில் பெரிய எழுத்துக்களில் தலைப்பு வந்து போனதும் மூத்தவர் புரோகோனிஷ் பகுதியில் வாழ்ந்து, மரணிக்கும் வரை அவர் தங்கியிருந்த - தற்போது செரோக்கி குடிகொண்டிருக்கும் குகையின் படத்தோடு சலனப்படங்கள் ஒன்றன் பின் ஒன்றாகத் திரையில் வந்து கொண்டிருந்தன.

இர்வின் தனது ஆய்வின் அறிமுகத்தை வெளிப்படுத்திவிட்டு, தொடர்ந்து வந்துகொண்டிருந்த சலனப்படங்களுக்கு விளக்கமளிக்கத் தொடங்கினான்!

“அமேசான் வனத்தின் ஜீவாதாரமாய் விளங்கும் “அமேசான் நதி” உலகின் மிகப் பெரிய நதியாகும். இந்த வனத்தை உருவாக்கிய பெருமை அமேசான் நதிக்கே வந்து சேரும்.

உலகின் மிகப் பெரிய பாம்பினமான “அனகொண்டா” அமேசான் நதிக்கரைகளில் வெகு சாதாரணமாய் காணப்படுகின்றன. பெரும்பாலும் இவை நீரிலேயே வாழ்கின்றன. இது தன் மூக்குப் பகுதியை மட்டும் நீர் மட்டத்துக்கு வெளியே நீட்டிக் கொண்டிருக்கும்.

அமேசான் நதியில் “டால்பின்” உட்பட சுமார் மூவாயிரம் மீன் வகைகள் உள்ளன. இந்தப் பகுதியில் காணப்படும். “ஈல்” வகை மீனினம் மின்சாரத்தைப் பாய்ச்சும் திறனுடையது. இது பாய்ச்சும் மின்சாரத்தால் ஒரு மனிதனைக் கொன்றுவிடக் கூட முடியும். தம்மைவிடப் பலமடங்கு பெரிய விலங்குகளைக்கூட ஒரு சில நிமிடங்களில் கடித்துக் குதறி எலும்புக் கூட்டை மட்டும் விட்டு வைக்கின்ற “பிரானா” மீன்கள் இங்கு ஏராளமாக உள்ளன.

சில இடங்களில் அமேசான் நதியின் அகலம் மலைக்க வைக்கும் விஸ்தீரம் கொண்டது. அதனால் இந்த நதிக்கு, “நதிக் கடல்” என்றொரு சிறப்புப் பெயரும் உண்டு.

கப்பல் போக்குவரத்தின் பொழுது எழும் அலைகளால் பக்கவாட்டு கரைப்பகுதி பாதிக்கப்படுவதால், வருடத்திற்கு வருடம் இந்த நதியின் அகலம் கூடிக் கொண்டே போகிறது.

எனவேதான் இந்நதிக்கு, “படகுகளை அழிக்க வல்லவன்” என்ற அர்த்தத்தில் “அமேசான்” என அங்கு வாழும் மக்கள்

தங்களது மொழியில் பெயர் சூட்டிக் கொண்டுள்ளனர்.

பூமிப்பரப்பில் உற்பத்தியாகும் “கார்பன்டைஸ் ஆக்ஸைட்டை” பெருமளவில் உட்கொள்வது அமேசான் காடுகள்தான். உலகின் உயிரினங்களில் மூன்றில் ஒரு பங்கு விலங்கினங்கள் இக்காடுகளில்தான் வசிக்கின்றன. நிலத்தடிக்குள் நுழையும் “கேப்பிபாரா”, மேல்நோக்கிப் பறக்கும் “ஸ்கார்லட் மக்காக்கள்”, மரத்துக்கு மரம் தாவும் “ஓரோபெண்டோலாஸ்”, “ஹவ்லர்” குரங்குகள் என்பன இந்தக் வனத்தில் அதிகமாகக் காணப்படுகின்றன.

எண்ணற்ற செடிகொடிகளையும், மூலிகைகளையும் தன்னகத்தே கொண்டுள்ள அதிசய உலகம் அமேசான் மழைக்காடுகள்!

அமேசானில் கிடைக்கும் 3000 பழ வகைகளில் 200 வகை மட்டுமே வெளி உலகத்தின் பயன் பாட்டுக்கு வருகின்றன. ஆனால் அங்கே வாழும் பழங்குடி மக்கள் சுமார் 2000 அரிய பழ வகைகளை உண்ணும் பேறு பெற்றவர்கள்!

பழங்குடி மக்களின் நோயெதிர்ப்புச் சக்திக்கு முக்கிய மூலகாரணம் அவர்கள் அன்றாடம் பருகி வரும் “சீனித்துளசி” (Stevia) கலந்த இஞ்சித் தண்ணியே! அது அவர்களைப் பல்வேறு நோய்களிலிருந்தும் பாதுகாக்கும் என்று பரம்பரை பரம்பரையாக நம்பிக் கொண்டிருக்கின் றார்கள்! வெளியுலகம் சீனித்துளசியை இப்போதுதான் பயன்படுத்தத் தொடங்கியுள்ளது!

பழங்குடிகள் அமேசான் மழைக்காடுகளில் இன்றளவும்

இயற்கைக்கு மிக இணக்கமாகவே வாழ்ந்து வருகின்றனர்.

முரா, முண்டூரா, பரோனி, ஹூரானி, கயாபோ, பன்ரா, திசானா, அரபாசோ, பாரா, பராசனா, கொடிரியா, குபியோ, அமகுனா, பிரா தபுயா, மிரிடி தபுயா, சிரியானோ, டுகானோ, டுயுகா, டடுயுர், தாய்வானோ மற்றும் யுறுதி போன்ற பல்வேறுபட்ட ஆதிக்குடிகள் அமேசான் நதிதீரத்திலும் - மழைக்காடுகளிலும் வாழ்ந்து வருகின்றனர்.

இவர்கள் விலங்குகளை வேட்டையாடி பச்சையாகவே உண்டு வருகின்றனர். இங்கு வாழும் ஒரு சில பழங்குடிகளுக்குச் சமையல் சமைப்பது என்றால் என்னவென்றே தெரியாது. இப்போதுதான் சிறிது சிறிதாக மாமிசம், காய்கறிகளை நெருப்பிலிட்டு உண்ணும் பழக்கத்திற்கு வந்துள்ளனர்!

இவ்வாறு நீண்டதொரு விளக்கவுரையை சலனப்படங்களின் நகர்வுகளோடு நிகழ்த்தி முடித்த இர்வின், வந்திருந்தவர்களுக்கு தனது சார்பில் நன்றி செலுத்தும் முறை வந்த வேளை, செரோக்கியையும் ரெங்க்மாவையும் மேடைக்கழைத்தபோது அவர்களிருவரும் ஆச்சரியப்பட்டவர்களாக மேடையை அடைந்தனர்! செரோக்கி தனது கோரிக்கை ஒன்றை அனைவர் முன்னிலையிலும் சமர்ப்பித்தான்!

கானகத்துக் காதலர்கள், தனது ஒப்படைக்கான தகவல் திரட்டலின்போது தனக்களித்த பேருதவியை இர்வின்

பலனூறு மேதைகள், கல்வியியலாளர்களுக்கு மத்தியில் மேடையில் நெருங்கி நின்று பாராட்டியது அவர்களுக்கு வியப்பைத் தந்தது!

அரங்கத்தில் அமர்ந்திருந்தவர்களின் கரகோசத்தால் கானகத்துக் காதலர்கள் பரவசமடைந்தார்கள்! வாழ்க்கையில் எந்தவொரு பழங்குடியினருக்கும் கிடைக்காத மதிப்பும் மரியாதையும் தமக்குக் கிடைப்பதை நினைத்து அவர்கள் பூரித்துப் போயினர்!

ஆய்வின் சமர்ப்பணம் முடிவுற்றதும் செரோக்கியையும் ரெங்க்மாவையும் மதிய போசனத்திற்காக, தானே நேரில் வந்து அழைத்துச் சென்றான் இர்வின்.

விழா முடிந்ததும் மரவேரடிக்கு அவர்கள் அழைத்து வந்து விடப்பட்டனர்.

தாம் உடுத்தியிருந்த பட்டாடைகளைக் கலைந்துவிட்டு, வனவாசிக் கோலத்திற்கு மாறிய அவர்கள் உந்துருளியில் ஏறித் தமது மண் நோக்கி நகர்ந்தனர்!

வண்டியைக் குகையிடுக்கில் வைத்துவிட்டு காட்டுக்குள் நடையாய் நடந்து, ரெங்க்மாவின் ஜாகை வரை சென்று அவளை அங்கு விட்டுவிட்டுத் தன் ஜாகை வந்து சேர்ந்தான் செரோக்கி!

(தொடரும்)

செம்மைத்துளியான்