இன்னா நாற்பது - 21.
ஈத்த வகையா னுவவாதார்க் கீப்பின்னா
பாத்துண லில்லா ருழைச்சென் றுணலின்னா
மூத்த விடத்துப் பிணியின்னா வாங்கின்னா
ஓத்திலாப் பார்ப்பா னுரை.
விளக்கம்:
- என்ன கொடுத்தாலும் மன நிறைவே இல்லாதவர்களுக்கு பொருள் கொடுத்து உதவுவது துன்பமாகும்.
- பிறரிடம் பகிர்ந்து உண்ணாதவர்களுடன் சேர்ந்து, உணவு அருந்துவது துன்பமாகும்.
- வயதான காலத்தில் நோய் வாய்ப் படுவது துன்பமாகும்.
- மறை ஓதா அந்தணர் கூறுபவன எல்லாம் துன்பமாகும்.
இன்னா நாற்பது - 22.
யானையின் மன்னரைக் காண்ட னனியின்னா
ஊனைத்தின் றூனைப் பெருக்குதல் முன்னின்னா
தேனெய் புளிப்பிற் சுவையின்னா வாங்கின்னா
கான்யா றிடையிட்ட வூர்.
விளக்கம்:
- யானைப் படை இல்லாத மன்னனைக் காண்பது துன்பமாகும்.
- பிற உயிர்களைக் கொன்று அதன் உடலைத் தின்று நம் உடலை வளர்ப்பது துன்பமாகும்.
- தேனும் நெய்யும் புளித்துப் போய்விட்டால், அது தரும் சுவை துன்பமாகும்.
- கரை புரண்டு ஓடும் காட்டாறுகளுக்கிடையே உள்ள ஊரில் வசிப்பது துன்பமாகும்.
(தொடரும்)
கட்டுரைகள் | Ai SONGS |
Email;vettai007@yahoo.com
0 Comments