திருக்குறள் விளக்கம்- திருநெவேலி குரலில்-132

வேட்டை Sunday, March 24, 2024

குறள் 172.

படுபயன் வெஃகிப் பழிப்படுவ செய்யார்

நடுவன்மை நாணு பவர்.

யாரையும் கண்ணை மூடிக்கிட்டு ஆதரிக்கவோ எதிர்க்கவோ செய்யாம நடு நிலைமையோடு இருக்கணும்னு நெனைய்க்கவொ நமக்கு ஒரு பலன் கிடைக்குமேன்னு நெனய்ச்சு எந்தக் காலத்துலயும் பழி வரக்கூடிய சங்கதிகளைச் செய்ய மாட்டாவொ.

குறள் 173.

சிற்றின்பம் வெஃகி அறனல்ல செய்யாரே 

மற்றின்பம் வேண்டு பவர்.

நல்ல வழியில வரக்கூடிய நிலையான இன்பத்தை விரும்புத பெரியவக, ஒரு போதும், ஒடனே பயன் வருதேன்னு நெனச்சு கெட்ட வழியில் நடக்க மாட்டாக.

குறள் 174.

இலமென்று வெஃகுதல் செய்யார் புலம்வென்ற 

புன்மையில் காட்சி யவர்.

எல்லா புலன்களையும் அடக்கி வாழத் தெரிஞ்சவொ, பட்டினியாக் கெடந்தாக் கூட கெடப்பாவொளே ஒழிய அடுத்தவன் பொருளுக்கு ஆசைப்பட மாட்டவொ.

குறள் 175.

அஃகி அகன்ற அறிவென்னாம் யார்மாட்டும்

வெஃகி வெறிய செயின்.

யார்கிட்டன்னாலும் சரி, அவொளோட பொருள் மீது ஆசைப்பட்டு, எவனாவது அதை அமுக்கப் பாத்தா, அவங்கிட்ட இருக்க அறிவு இருந்தா என்ன இல்லாட்டா என்ன?